Ինձ համար անսպասելի էր, որ իմ անունն էլ կհայտնվի այն անձանց ցուցակում, որոնց ուղղված է Ժիրայր Սեֆիլյանի դիմումը։ Այդ մասին «Առաջին լրատվական»-ի հետ զրույցում նշել է Ազգային ժողովի նախկին փոխնախագահ Կարապետ Ռուբինյանը։
«Համոթ ինձ՝ պետք է ասեմ, որ վերջին ժամանակներս բավականին պասիվ եմ եղել, թեև ինձ երբեք պայքարի ճամբարից դուրս չեմ համարել։ Մյուս կողմից էլ՝ Ժիրայրի դեպքում շատ սպասելի է նման կոչը, որովհետև մարդ, որն իր ամբողջ գիտակցված կյանքը նվիրել է իր ժողովրդին, անշուշտ պիտի նույնիսկ բանտում իրեն հանգիստ չզգա»,-նշեց Ռուբինյանը։
Նա արձանագրեց, որ Ժիրայր Սեֆիլյանը քաղբանտարկյալ է և նշեց՝ բոլորս պետք է պայքարենք, որ նա օր առաջ, մյուս քաղբանտարկյալների հետ միասին, դուրս գա ռեժիմի ճիրաններից։
«Ինչ վերաբերում է բուն կոչին, ես ձեզնից իմացա, որ նման բան է եղել։ Մեկ անգամ շատ հպանցիկ կարդացի և անշուշտ կիսում եմ նրա անհանգստությունը երկրում ստեղծված իրավիճակի համար։ Եթե մի բառով ասեմ, մենք տանուլ ենք տալիս երկիրը։ Երկիրը թողել ենք թալանչիների, տգետների քմահաճույքին և մի տեսակ իներտ, համակերպվող ենք դարձել։ Սա անթույլատրելի է նման վիճակում գտնվող երկրի համար։ Ինչ վերաբերում է հարցին՝ պատրա՞ստ եմ, թե՞ ոչ, իհարկե պատրաստ եմ ուժերիս ներածին չափով մասնակից դառնալ, օժանդակել ցանկացած նախաձեռնության, որը միտված կլինի երկիրն այս վիճակից հանելուն»,- ընդգծեց Ռուբինյանը։
Դիտարկմանը, որ փաստորեն իր հետ չի համաձայնեցվել, որ իր անունը լինելու է կոչում, Ռուբինյանը պատասխանեց. «Այո, ինձ համար անսպասելի էր դա, մյուս կողմից էլ՝ ինչպե՞ս պետք է Սեֆիլյանը բանտից համաձայնություններ ստանար, այն դեպքում, երբ մի ամբողջ տարի թույլ չէին տալիս անգամ զավակների ու կնոջ հետ հանդիպի։ Ես այստեղ հանցանք չեմ տեսնում, որովհետև մարդն իր կարծիքն է հայտնել, և ինչ-ինչ մտորումների արդյունքում ինչ-որ ցուցակ է ներկայացրել և ասում է, որ ամբողջական չէ այդ ցուցակը, կարող են լինել լրացումներ»։
Հարցին, թե իր համար ընդունելի՞ է լինել մի ցուցակում, որտեղ կան անձինք, որոնք բազմիցս իրենց հարցազրույցներում նշել են, որ չեն կրում եվրոպական ու արևմտյան արժեքներ, մինչդեռ նա հայտնի է որպես ազատական գործիչ, Կարապետ Ռուբինյանն արձագանքեց. «Բնականաբար, երբ երկիրը նման աղետալի վիճակում է, երբ անկախությունը համարյա ոչնչացված է ռեժիմի ջանքերի շնորհիվ, դա վերաբերում է քաղաքական բոլոր հոսանքներին, որովհետև մանկիկը, որը Հայաստանի Հանրապետությունն է, մեր բոլորինն է՝ անկախ նրանից՝ ես ազատական եմ, մյուսը ազգայնական, կամ երրորդը կոմունիստ է։ Եթե ազգային փրկության ճակատի մասին է խոսքը, եթե երկրի ինքնիշխանությունը հեղափոխության ճանապարհով վերադարձնելու մասին է խոսքը, բնականաբար, շատ տարբեր հոսանքներ կարող են և պարտադիր է, որ մասնակցեն։ Ամենակարևոր հատկանիշը, որ պետք է լինի այդ գործիչների համար՝ նվիրվածությունն է Հայաստանին, ՀՀ ժողովրդին և ռեժիմի հետ ցանկացած համագործակցության բացառումը»։
Նշենք, որ այսօր Ժիրայր Սեֆիլյանը բանտից հասցեական դիմում է ներկայացրել հասարակական ու քաղաքական գործիչներին՝ կոչ անելով ստեղծել ազգային դիմադրության ճակատ և ժողովրդական ընդվզման նախապատրաստվել։
Հարցազրույցն ամբողջությամբ՝ տեսանյութում: