Լիբանանի Հայ երիտասարդաց ընկերակցության մամլո և տեղեկատվության պատասխանատու Ահարոն Շխրտմյանն «Առաջին լրատվական»-ի հետ զրույցում, անդրադառնալով Հայաստան-Սփյուռք համաժողովին, ասել է, որ հավատում են՝ այս ժողովները, որոնք ոմանց համար գուցե խորություն չունեն, բայց իրականում նպատակ ունեն կողք կողքի բերել տարբեր մտայնության, տարբեր գաղափարներ ունեցող մարդկանց և այդ մոտեցումները քննարկել։
«Հնարավոր է, որ այդ մոտեցումները հակասական լինեն, փոխադարձ քննադատություններ լինեն, բայց բոլոր դեպքերում պետք է հավաքվել և մեր ընդհանուր մտահոգությունները երկխոսության ճանապարհով լուծել։ Կարծում եմ՝ այս համաժողովը պատճառ դարձավ, որ ավելի մոտիկից քննարկվեն մի շարք հարցեր, որոնք մինչ այդ թե՛ հայրենիքում, թե՛ Սփյուռքում շատ մակերեսային ձևով էր քննարկվում»,- ասաց նա։ Ահարոն Շխրտմյանի խոսքերով՝ այս համաժողովի դրական կողմն այն էր, որ բոլոր կողմերն իմացան, որ միմյանց կարիքն ունեն, որ երկու կողմն էլ լուրջ աշխատանքների կարիք ունի՝ և՛ Հայաստանը՝ իր սոցիալական ու տնտեսական հարցերով, արտագաղթի հարցով, և՛ Սփյուռքը՝ իր հայ ինքնությունը պահպանելու իմաստով։
«Մեր մաղթանքն է, որ այս համաժողովները համադրեն մեր ընդհանուր ցավերը և սկսենք մտածել դրանց լուծման ուղղությամբ»,- հավելեց նա:
Նրա կարծիքով՝ Սփյուռքի կուսակցությունները սպառել են իրենց, քանի որ իրենց ազգային քաղաքական առաքելության մեջ են սպառել իրենց:
«Սփյուռքում կուսակցություններ կան, որ ժամանակի հոսանքով են ապրում, շնչում, և որակի լուրջ բարեկարգության անհրաժեշտություն ունեն»,- ասաց Ահարոն Շխրտմյանը:
Հարցազրույցն ամբողջությամբ՝ տեսանյութում: