Հետևելով Ապրիլյան պատերազմից հետո ՊՆ-ում պաշտոնանկություններին, հարուցված քրեական գործերից հետո զարգացումներին, տպավորություն է, թե հնարավորինս անաղմուկ ցանկանում են ծածկադմփոց անելով, գործերը փակել: Այդ մասին «Առաջին լրատվական»-ի հետ զրույցում ասաց փաստաբան Նորայր Նորիկյանը՝ անդրադառնալով Զինված ուժերի սպառազինության վարչության նախկին պետ, ծանր հանցագործության մեջ մեղադրվող գեներալ-մայոր Մելսիկ Չիլինգարյանի հայտարարությանը, թե հարուցված քրեական գործով նա անմեղ է ճանչվել, պարզվել է՝ մեղավորը նրա տեղակալն է: Գեներալը նաև հայտարարել էր, որ իրեն խրախուսել են, նվերներ են տվել, ուղարկել են պահեստազոր՝ 60 տարին լրանալու կապակցությամբ, աշխատանքից ազատվել է սեփական դիմումի համաձայն, և հիմա էլ կրկին պաշտպանության նախարարությունում է՝ նախարարին կից բարձրագույն սպայական հանձնաժողովի անդամ է:
«Շատ սխալ է, երբ դուք հայտարարում եք, որ որոշակի բնագավառում և հատկապես պաշտպանության նախարարության, կատարվել են այս կամ այն աստիճանի չարաշահումներ, դուք իրականացնում եք աղմկոտ ձերբակալություններ, այդ թվում՝ արգելանքի եք վերցնում զինված ուժերի գեներալի և որոշակի աղմուկից հետո կամաց-կամաց խափանման միջոց եք փոխում և որևէ հաշվետվողականություն չեք ցուցաբերում, թե ինչ ելքով ավարտվեցին այդ գործերը: Սա անթույլատրելի վարքագիծ է համապատասխան իրավասու մարմինների կողմից՝ ով ուզում է լինի, դա կլինի գլխավոր դատախազություն կամ այլ և այլ վարույթ իրականացնող մարմին»,-շեշտեց Նորայր Նորիկյանը:
Ըստ նրա՝ տեղին են նաև այն մտահոգությունները, թե Ապրիլյան պատերազմից հետո պատասխանատվության ենթարկվողներ, ըստ էության չկան, նաև այն պատճառով, որ համակարգից շատ անձինք կարող են ներգրավվել գործում:
«Կարող է մեկի պատասխանատվության ենթարկելը բերի շղթայական հանցագործությունների բացահայտմանը, որի հետևանքով կարող են շատ-շատ հաստ և տաք գլուխներ թռնել: Այդպիսի պայմաններում համակարգը չի ցանկանում այդ գլուխների թռնելը, որի պատճառով այս ծածկադմփոցներն են կատարվում»,- նշեց փաստաբանը:
Մանրամասները՝ տեսանյութում: