«Պատասխանների առատությունից կարելի է ենթադրել, որ մեր առաջարկը լայն արձագանք ստացավ՝ ուղղակի դրական արձագանք չէր։ Մենք մոտավորապես նման արձագանք էլ սպասում էինք, այդ պատճառով Րաֆֆի Հովհաննիսյանն իր ասուլիսի ժամանակ ասաց՝ նախաձեռնողը մենք չենք լինի, կթողնենք, որ մեր գործընկերները դա անեն»,- «Առաջին լրատվական»-ի հետ զրույցում նման տեսակետ հայտնեց «Ժառանգություն» կուսակցության փոխնախագահ Արմեն Մարտիրոսյանը՝ ի պատասխան մեր այն դիտարկման, որ իրենց նախաձեռնած՝ ընդդիմադիր դաշտի միավորումն ու թավշյա հեղափոխություն իրականացնելու գաղափարը չստացվեց իրագործել։
«Ժառանգություն» կուսակցությունն իր հիմնադրման 15-ամյակին նվիրված տոնական միջոցառմանը հրավիրել էր ընդդիմադիր «Ելք» դաշինքին։ Մեր այն հարցին՝ արդյոք այդ դաշինքի հետ գտնվե՞լ են համագործակցության կոմպրոմիսային տարբերակներ, Մարտիրոսյանն արձագանքեց. «Մենք շատ գործընկերների ենք հրավիրել, քաղաքական դաշտում մենք քարեր նետելու ուղղությամբ չենք աշխատել։ Մեր հասցեին ոչ միայն քննադատություն, այլև վիրավորանք է եղել, բայց պետության ու քաղաքացու խնդիրը տասնյակ անգամ կարևոր է, քան մեր անձնական կամ կուսակցական վերաբերմունքը։ Եթե օրակարգային հարց լինի՝ մենք կհամագործակցենք։ ԵԱՏՄ-ի հետ կապված կսպասենք իրենց առաջարկներին»։