Հպարտ եմ, որ հայ եմ և հանդես եմ գալիս Հայաստանի դրոշի ներքո․ Լիլիթ Պողոսյան
Բադմինթոնի Հայաստանի հավաքականի առաջատար Լիլիթ Պողոսյանը մեկնել է Դանիա՝ մասնակցելու միջազգային ուսումնամարզական հավաքի: Այն կազմակերպել է Եվրոպական կոնֆեդերացիան:
«Առաջին լրատվական»-ի հետ զրույցում Լիլիթը պատմել է իր անցած ուղու և Դանիա ուսումնամարզական հավաքի մասին։
-Մի փոքր պատմեք ձեր մարզական ուղու մասին։
-Բադմինթոն սկսել եմ պարապել 4 տարեկանից՝ Կիլիկա մարզադահլիճում։ Մարզիչս հայրս է եղել, ով տարիներ շարունակ մեծ ջանքեր է գործադրում բադմինթոնը Հայաստանում տարածելու և զարգացնել համար: Ճիշտ է պարապելու համար նախատեսված պայմանները լավ չէին, բայց ի վերջո շատ բան եմ սովորել այնտեղ պարապելով: Կամքի ուժ՝ առաջին հերթին և հենց դրա շնորհիվ եմ հասել Դանիա: Նույն սերը դեպի մեր սպորտը կա նաև իմ մեջ, էդ պատճառով թողեցի ամեն ինչ իմ երկրում և եկա Դանիա՝ նպատակիս ետևից։
–Ինչպե՞ս են ընթանում ուսումնամարզական հավաքները Դանիայում։
-Պարապմունքները շատ լավ են ընթանում, օրական 2-3 անգամ ենք պարապում: Ամեն օր արթնանում ենք առավոտյան 6:00-ին, առաջին պարապմունքը՝ 7:30-10:00-ն է: Շաբաթվա ընթացքում պարապում ենք 8 անգամ կորտում, 3 անգամ՝ մարզասրահում, 1 անգամ էլ վերականգնողական մարզում, ինչպես նաև դրսում՝ թեթև աթլետիկայի վազքուղու վրա: Ամեն ինչ շատ պրոֆեսիոնալ է կազմակերպված:
-Որո՞նք են լինելու առաջիկա մրցաշարերը, որոնց մասնակցելու եք։
-Առաջին մրցաշարս կլինի սեպտեմբերի 30-ին Կոպենհագենում, որը Դանիայի մրցաշարերից մեկն: է հանդիսանում։ Հաջորդը՝ հոկտեմբերի 5-8 «Babolat Bulgarian International» մրցաշարը՝ Բուլղարիայի մայրաքաղաք Սոֆիայում։ Հպարտ եմ, որ հայ եմ և հանդես եմ գալիս Հայաստանի դրոշի ներքո։