«Իմ կարծիքով՝ դա վարչապետի նախաձեռնությունը չէր․ մեր երկրում չի ընդունվում որևէ որոշում առանց Բաղրամյան 26-ի տեղյակ լինելու կամ տվյալ որոշման մեջ առանց մասնակցություն ունենալու»,- «Առաջին լրատվականի»-ի հետ զրույցում ընդգծեց քաղաքական մեկնաբան Դավիթ Ստեփանյանը՝ խոսելով ԿԳՆ կողմից մշակված ռուսաց լեզվի դասավանդման հայեցակարգի մասին։
Հիշեցնենք, որ ըստ այդ հայեցակարգի՝ արտոնություններ է վերապահվելու այս լեզվին, մասնավորապես․ նախատեսվում է ավելացնել ռուսաց լեզվի խորացված ուսուցմամբ դպրոցների և դասարանների թիվը, ինչպես նաև «Ռուսաց լեզու» առարկայի պետական ամփոփիչ ատեստավորման ժամանակ ոչ միայն գրավոր, այլև բանավոր խոսքի տիրապետման մակարդակի գնահատում է կատարվելու։ Նկատենք նաև, որ հայեցակարգի հիմնավորման մեջ նշվում է, որ իրավական այս ակտի ընդունման անհրաժեշտությունը «պայմանավորված է վարչապետի հանձնարարականով»։
Այս համատեքստում Դավիթ Ստեփանյանը նկատեց, որ ԱՊՀ երկրների շարքում Հայաստանն այն երկիրն է, որտեղ ռուսաց լեզվի դասաժամերն առանց այն էլ բավականին շատ են, որն անհամեմատելի է անգլերենի, ֆրանսերենի կամ գերմաներենի հետ։
«Հետևաբար, նման պարագայում այսպիսի հայեցակարգի որևէ շարժառիթ, որևէ ռեալ հիմք չկար»,- հավելեց նա։
Մեր զրուցակցի գնահատմամբ՝ այս հայեցակարգի շարժառիթները, միանշանակ, քաղաքական ենթատեքստ ունեն։
«Սա կոմպրոմիս է․ Մոսկվայից եկել է մեսսիջ, որին մեր կառավարությունը չէր կարող չպատասխանել․ այս հարցը քաղաքական է և կրթության հետ ռեալ եզրեր չունի։
Հայաստանի ցանկացած քաղաքացի, որը փնտրել է աշխատանք և հայտարարությունների հիման վրա դիմել է այս կամ այն կազմակերպությանը, շատ լավ գիտի մի պարզ իրողություն՝ պահանջվում է իմանալ անգլերեն, իսկ ռուսերենը շատ չնչին մասնաբաժին ունի աշխատատեղեր տրմադրող գործատուների տրամաբանության մեջ․Հայաստանում մեծ տարածում ունեցող ռուսական ընկերությունների հիմնական պահանջն անգամ անգլերենն է , իսկ ռուսերենը զբաղեցնում է 2-րդ, 3-րդ տեղը՝ հենց նույն Beeline, Viva Cell ընկերություններում և այլն։ Այսինքն, մեր հասարակությունում, գործատու կազմակերպությունների մոտ նման պահանջ չկա և սա ընդամենը ինչ-որ մի պատրվակ է , եթե իհարկե, խոսքը վերաբերում է հայաստանյան շուկային, բայց ուրիշ բան, եթե խոսքը վերաբերեր մեր այն հայրենակիցներին, ովքեր աշխատում են Ռուսաստանում, քանի որ այնտեղ, իրոք, այդ խնդիրը կա»,- նշեց Ստեփանյանը։
Մանրամասները՝ տեսանյութում։