Շիրակի մարզի ընդհանուր իրավասության դատարանում Աշոտ Մանուկյանի նախագահությամբ ավարտվել է անչափահաս Սերյոժա Մ.-ի գործի դատական քննությունը:
Ուսումնարանի 16-ամյա ուսանող Սերյոժա Մ.-ին մեղադրանք էր առաջադրված այն բանի համար, որ 2016 թվականի նոյեմբերի 12-ին, ժամը 17-ի սահմաններում Մարալիկի նախկին մշակույթի տանը հարակից այգում իրեն նախկինում ծեծելու հարցի շուրջ վիճաբանել է Մարալիկի բնակիչներ Տիգրանի, Կարենի, Հակոբի, Վիգենի, Աթաբեկի, Վահանի և Նարեկի հետ: Վիճաբանության ընթացքում Սերյոժան տեսել է, որ վերոհիշյալ տղաները ծեծում են իր մեծ եղբորը և հանկարծակի ծագած կումուլյատիվ աֆեկտի վիճակում իր մոտ եղած խոհանոցային դանակով «լարվածությունը լիցքաթափելու, եղբորը պաշտպանելու նպատակով» անկանոն հարվածներ է հասցրել Տիգրան Ա.-ի ու Կարեն Ս.-ի մարմնի տարբեր մասերին:
Տիգրանի առողջությանը՝ կրծքավանդակի աջ կեսի հետին մակերեսի ծակած-կտրած վերքի ձևով, Կարենի առողջությանը՝ կրծքավանդակի ձախ կեսի առաջային մակերեսի ծակած-կտրած, կրծքախոռոչ և որովայնի խոռոչ թափանցող, ձախ թոքի, ստոծանու ձախ գմբեթի, լյարդի աջ բլթի վնասումով վերքի, ձախ բազկի շրջանի կտրած վերքի ձևով պատճառել է կյանքին վտանգ սպառնացող ծանր վնաս:
Սերյոժա Մ.-ին մեղադրանք էր առաջադրվել հոգեկան խիստ հուզմունքի վիճակում երկու անձանց առողջությանը ծանր վնաս հասցնելու համար՝ ՀՀ քրեական օրենսգրքի 114հոդվածի 2-րդ մասով:
Անչափահաս ամբաստանյալ Սերյոժա Մ.-ն նախաքննության և դատաքննության ընթացքում իրեն մեղավոր է ճանաչել:
Նա հայտնել է, որ 2016 թվականի նոյեմբերի սկզբներին՝ ստույգ օրը չի հիշում, ժամը 13-ի սահմաններում Մարալիկի թիվ 1 դպրոցի մոտ հանդիպել է Հակոբին, Կարենին ու Վիգենին:
Զրույցի ընթացքում Վիգենը կատակով հրել է իրեն: Վիգենը, Վահանն ու Հակոբը միշտ ծաղրում էին իրեն՝ ցույց տալով, թե իրենից «լավ տղա» են:
Վահանը երկար մազեր ունենալու պատճառով իրեն «ղզիկ» է անվանել: Ինքը զգուշացրել է, որ իր հետ այլևս նման «կատակներ» չանեն: Այդ հարցի շուրջ իր, Վիգենի ու Հակոբի միջև վիճաբանություն է ծագել:
Վիգենն ու Հակոբը ձեռքերով ու ոտքերով հարվածել են իրեն: Այնուհետև նրանք առաջարկել են գնալ այգի՝ ավելի սակավամարդ տեղ, ու խոսել, բայց ինքը չի համաձայնել՝ վախենալով, որ իրեն նորից կծեծեն:
Ինքը գնացել է գյուղ, մեծ եղբորը պատմել է կատարվածի մասին ու առաջարկել է միասին գնալ Մարալիկ, հանդիպել Վիգենին ու Հակոբին, բայց եղբայրը չի ցանկացել, ասել է, թե իրենց կծեծեն:
Եղբոր պատասխանից ինքը վրդովվել է:
Վիգենին ու Հակոբին «տակ չտալու» նպատակով, միաժամանակ վախենալով նրանց հետ հանդիպելուց, ինքը նույն օրը, ժամը 20-ի սահմաններում զանգել է Վիգենին և հայհոյել է նրան ու նրա ընկերներին:
Մինչև նոյեմբերի 12-ը գյուղում է մնացել:
Նոյեմբերի 12-ին, ժամը 15-ի սահմաններում եղբոր հետ գնացել է Մարալիկ՝ այնտեղ ժամանակավոր բնակվող ու որպես կթվորուհի աշխատող մորը տեսնելու:
Մարալիկի ավտոկայանից դեպի տուն գնալիս պատահական հանդիպել է Վահանին, բայց նրա հետ չի խոսել:
Ժամը 16-ն անց 30-ի սահմաններում ցանկացել է տանից դուրս գալ, բայց տեսել է, որ իրենց շենքի մուտքի մոտ արդեն կանգնած են Վիգենը, Հակոբը, Կարենը, Վահանը և մի քանի ուրիշ տղաներ:
Հասկացել է, որ նրանք հավաքվել են իրեն տեսնելու համար, բայց եղբորը ոչինչ չի ասել:
Մի քանի րոպե անց եղբայրն առաջարկել է տանից դուրս գալ ու զբոսնել: Ինքը եղբորից թաքուն խոհանոցային դանակ է վերցրել՝ ապահովության համար, այն պահել է բաճկոնի
ծոցագրպանում:
Ինքն ու եղբայրը դուրս են եկել:
Շենքի մուտքի մոտ էին Վիգենը, Հակոբը, Կարենը, Վահանը, Աթաբեկը, Տիգրանն ու Նարեկը: Վիգենը իրենց ասել է՝ մոտեցեք: Մոտեցել են: Որոշել են գնալ նախկին մշակույթի տան հարակից այգի՝ պարզաբանում կատարելու:
Նախկին մշակույթի տան հետնամաս են գնացել: Հակոբը հագից հանել է վերնաշապիկն ու մայկան, կանգնել է իր դիմաց ու ասել է. «Ա՛յ տղա, լավ տղա՞ կխաղաս»:
Նա մեկ անգամ ապտակել է իրեն: Ինքն անակնկալի է եկել ու վախենալով՝ չի պատասխանել ապտակին: Իր փոխարեն փորձել է պատասխանել եղբայրը, բայց նրան գցել են գետնին ու մի քանի հոգով սկսել են ծեծել:
Ինքը մտածել է, որ նրանք շատ են, իրենց կծեծեն, նրանց վախեցնելու, իրեն ու եղբորը պաշտպանելու նպատակով հանել է դանակը ու սկսել է անկանոն հարվածներ հասցնել:
Կոնկրետ որևէ մեկին հարվածելու նպատակ չի ունեցել: Դանակը անկանոն շարժելու ընթացքում է տեսել, որ Հակոբը արյունոտ է: Վախեցել ու այգուց փախել է: Որոշել է ներկայանալ մոտակայքում ծառայություն իրականացնող ոստիկաններին:
Ավտոկայանի մոտակայքում հանդիպել է ոստիկանների: Նրանց ասել է, որ մարդ է դանակահարել, եղբորն էլ այդ մարդիկ ծեծում են: Ոստիկաններից մեկն իրեն տարել է բաժին, իսկ մյուսները գնացել են դեպքի վայր:
Ոստիկանության բաժնում ինքը ներկայացրել է խոհանոցային դանակը:
Ինքն այդպես է վարվել, քանի որ տեսել է՝ եղբորը ծեծում են: Եթե ցանկանար կոնկրետ անձանց հարվածել, կհարվածեր Վիգենին ու Վահանին, ոչ թե Կարենին ու Տիգրանին, որոնց հետ ինքը նախկինում կոնֆլիկտ չի ունեցել:
Սերյոժա Մ.-ն իրեն մեղավոր է ճանաչել, զղջացել է:
Տուժող Տիգրան Ա.-ն հայտնել է, որ 2016 թվականի նոյեմբերի 12-ին, ժամը 16-ի սահմաններում Վահան Կ.-ն զանգել է իրեն ու ասել է, որ իրեն, Վիգենին ու Հակոբին հայհոյելու հարցի հետ կապված՝ պետք է Սերյոժա Մ.-ի հետ պարզաբանում կատարեն նախկին մշակույթի տան հարակից այգում:
Ինքը գնացել է այնտեղ: Լսել է գոռգոռոց, տեսել է, որ մի քանի հոգով ծեծում են Սերյոժայի եղբորը: Փորձել է վերջինիս մի կողմ տանել, բայց հետևից ծակոց է զգացել: Հասկացել է, որ դանակահարվել է: Տեսել է, որ Սերյոժան դանակը ձեռքին վազում է: Տեսել է Կարենին՝ արյունոտված, և Հակոբին՝ նույնպես արյունոտ, գոտկատեղից վերև մերկ:
Գնացել է այգու խաչքարի մոտ: Հետո նորից մոտեցել է Սերյոժայի եղբորը ծեծողներին, ինքն էլ բարկությունից ոտքերով ու ձեռքերով մի քանի անգամ հարվածել է նրան:
Միջամտել են այլ մարդիկ, եկել են ոստիկանները: Նրանք իրեն ու Կարենին տեղափոխել են հիվանդանոց: Այնտեղից տեղափոխել են Գյումրու բժշկական կենտրոն:
Տուժող Տիգրանն ասել է, թե Սերյոժայի դեմ բողոք, պահանջ չունի, քանի որ նա պատահական է հարվածել իրեն, իրենք երբևէ կոնֆլիկտ չեն ունեցել:
Տուժող Կարեն Ս.-ն հայտնել է, որ ինքը նոյեմբերի սկզբին ներկա է եղել միջադեպին, երբ Վիգենը կատակ է արել Սերյոժայի հետ ու հրել է նրան: Քանի որ Սերյոժան զգուշացրել էր Վիգենին, որ իր հետ նման կատակներ չանի, վիճաբանություն է առաջացել Սերյոժայի, Վիգենի ու Հակոբի միջև: Վիգենն ու Հակոբը հարվածներ են հասցրել Սերյոժային, ինքը բաժանել է: Սերյոժան ասել է, թե եղբոր հետ կգա, ու հեռացել է:
Նույն օրը ավելի ուշ ինքը Վիգենից տեղեկացել է, որ Սերյոժան զանգել է նրան ու հայհոյել, ապա անջատել է հեռախոսը:
Նոյեմբերի12-ին իրեն զանգել է Վահանն ու ասել է, թե Սերյոժան եկել է Մարալիկ, հավաքվելու են՝ նրանից պարզաբանում պահանջելու:
Դեպքի վայրում տղաները սկսել են ծեծել Սերյոժայի եղբորը, ինքը նրան չի հարվածել: Խառնաշփոթի մեջ Սերյոժան իրեն դանակով հարվածներ է հասցրել: Ինքը գնացել է խաչքարի մոտ: Սերյոժան փախել է: Ինքը տեսել է, որ Սերյոժայի եղբայրը փորձում է հեռանալ, բայց տղաները հասել են նրան, նորից սկսել են ծեծել: Ինքը արյունաքամ էր լինում, տեսել է, որ մոտենում են ոստիկանները, ու կորցրել է գիտակցությունը: Ուշքի է եկել շտապօգնության մեքենայի մեջ:
Այս տուժողը նույնպես Սերյոժայի դեմ բողոք, պահանջ առաջ չի քաշել՝ ասելով, թե նա պատահաբար է հարվածել իրեն, նախկինում իրենք կոնֆլիկտ, անախորժություն չեն ունեցել:
Դատահոգեբանական փորձաքննության եզրակացությամբ՝ Սերյոժա Մ.-ն հանցավոր արարքը կատարել է կումուլյատիվ աֆեկտի վիճակում:
Դատարանը հաշվի է առել, որ ամբաստանյալը հանցավոր արարքը կատարել է անչափահաս տարիքում, ընդունել է մեղքը, զղջացել է, տուժողները բողոք, պահանջ առաջ չեն քաշել:
Սերյոժա Մ.-ն մեղավոր է ճանաչվել ՀՀ քրեական օրենսգրքի 114 հոդվածի 2-րդ մասով և դատապարտվել է 1 տարի 6 ամիս ազատազրկման: Նրա նկատմամբ պայմանական դատապարտություն է կիրառվել, ու ահմանվել է 1 տարի 6 ամիս փորձաշրջան: