«Առաջին լրատվական»-ի տեղեկություններով՝ մի քանի օր է՝ Գորիս քաղաքի մանկապարտեզներում և դպրոցներում սննդային թունավորման մասսայական դեպքեր են գրանցվում: 40-ից ավելի երեխա այս օրերին բուժում է ստանում Գորիսի բժշկական կենտրոնում: Առաջին դեպքը գրանցվել է դեռևս սեպտեմբերի 11-ին: Այսօր ևս թունավորման դեպք է գրանցվել: Գորիսի երրորդ դպրոցից մի քանի աշակերտ կրկին դիմել են Գորիսի բժշկական կենտրոն: Տեղեկությունը մեզ հետ զրույցւոմ հաստատեց նաև Գորիսի ԲԿ-ի մանկական բաժանմունքի վարիչը: Նրա խոսքով՝ երեխաները արդեն լավ են: Բոլորի վիճակը կայունացել է, և առաջիկա օրերին կղանքի երկրորդ անալիզի պատասխաններից կախված կսկսեն դուրս գրել երեխաներին: Բժշկուհին նշեց, որ երեխաներից երկուսի վիճակը շատ ծանր է եղել, բայց նրանք ևս արդեն լավ են: «Ընդհանուր 39 երեխա է դիմել, երկուսն էլ այսօր են դիմել»,- ասաց բժշկուհին:
Մանկական բաժանմունքի վարիչը հրաժարվեց նշել, թե կոնկրետ ինչից է առաջացել թունավորումը՝ նշելով, որ դա սանէպիդկայանի իրավասությունն է արդեն:
Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցը «Առաջին լրատվական»-ի հետ զրույցում ասաց, որ առաջին դեպքը տեղի է ունեցել սեպտեմբերի 14-ին, երբ Գորիսի ԲԿ-են դիմել աղիքային վարակ նախնական ախտորոշմամբ 27 հիվանդ:
«Անմիջապես տեղում կատարվել է նմուշառում, անհրաժեշտ հետազոտություն է կատարվել մեր կողմից, այդ թվում՝ հակահամաճարակային միջոցառում է կազմակերպվել մեր կողմից: Հետազոտվել են և՛ հիվանդները, և՛ դպրոցում առկա սննդամթերքի կենսանմուշները, սննդի ու հիվանդների հետ կոնտակտ ունեցող անձանցից էլ ենք կենսանմուշներ վերցրել վարակի աղբյուրը պարզելու ահմար: Արդյունքում հայտնաբերվել է միևնույն տեսակի շիգելազոնե հարուցիչ: Այն հայտնաբերվել է 27 հիվանդներից 21-ի մոտ, դպրոցի սննդի հետ կապված աշխատակիցներից 2-ի մոտ, 14 կոնտակտավոր անձանցից 7-ի մոտ և դպրոցի 4 սննդատեսակներից 2-ում»,- նշեց տիկին Բակունցը՝ հավելելով, որ այդ հարուցիչը դեզինտերիա հիվանդության հարուցիչ է, սուր աղիքային վարակի մի տեսակ է, որը արտահայտվում է ջերմությամբ, սրտխառնոցով, փսխումով, լուծով, իսկ հիվանդները լինում են միջին ծանրության:
«Նոր դեպքեր պետք է որ չլինեն, քանի որ այդ սնունդը արդեն չկա»,- նշեց ՀՎԿԱԿ փոխտնօրենը՝ հավելելով, որ վերջին երկու դեպքը վերը նշված դեպքերի հետ համաճարակաբանական որեւէ կապ չունեն:
Նունե Բակունցը նշեց, որ տվյալ դեպքում Գորիսի դպրոցում սուր աղիքային վարակի պատճառը եղել է սնունդը: Աղիքային վարակի հարուցիչը հայտնաբերվել է աղցանի մի տեսակում և կարտոֆիլի խյուսի մեջ: Վարակվածները 1-4-րդ դասարանի երեխաներ են եղել:
Թեև Գորիսի ԲԿ-ից մեզ ասել էին, որ այսօր ևս երկու երեխա Գորիսի երրորդ դպրոցից նույն ախտանշաններով դիմել է հիվանդանոց, սակայն Նունե Բակունցը նշեց, որ նոր դեպքեր չկան՝ չնայած կարող է մարդկանց մոտ գաղտնի շրջան լինել և հետո դրսևորվել:
«Նոր դեպքեր պետք է որ չլինեն, քանի որ այդ սնունդը արդեն չկա»,- նշեց ՀՎԿԱԿ փոխտնօրենը:
Ուշագրավ է, որ մեկ շաբաթից ավելի է՝ Գորիսում այս վիճակն է, սակայն պատկան մարմիններից՝ նախարարությունից, սննդի անվտանգության պետական ծառայությունից, որևէ տեղեկություն այդ մասին չի տարածվել, երեխաների վիճակի մասին որևէ ինֆորմացիա չի տրամադրվել: Փոխարենը փորձ է արվել ամեն բան խնամքով թաքցնել: Սակայն հաջորդիվ Սննդամթերքի անվտանգության պետական ծառայությունը պետք է որ պատասխանի, թե ինչպես է դեզինտերիայի հարուցիչը հայտնվել դպրոցականների սննդի մեջ ու կարծես թե դեռ կա ու շարունակվում է: