Ինչպես հայտնի է, Հայաստան-Սփյուռք 6-րդ համաժողովին «Ելք» դաշինքի ներկայացուցիչները հրավիրված չէին, ինչը «Ելք»-ի ներկայացուցիչներին առիթ տվեց հայտարարելու, որ համաժողովը ոչ թե համահայկական է, այլ ընդամենը իշխանական:
Հանրապետական խմբակցության ղեկավար Վահրամ Բաղդասարյանը, սակայն, երեկ արձագանքել էր «Ելք»-ին հրավեր չուղարկելու թեմային և նշել էր, որ հակառակը՝ իրենց հրավեր ուղարկվել է: «Ես ճշտել եմ՝ համապատասխան գերատեսչության կողմից հրավերն ուղարկվել է «Ելք» դաշինքին, և ինձ Ազգային ժողովի աշխատակազմը զեկուցել է, որ սեպտեմբերի 15-ին հրավերը հանձնվել է խմբակցությանը», – հայտարարել է Վահրամ Բաղդասարյանը:
«Ելք» խմբակցության քարտուղար Գևորգ Գորգիսյանը «Առաջին լրատվական»-ի հետ զրույցում պնդեց, որ իրենք պաշտոնապես գրավոր հրավեր չեն ստացել: Պարզապես վերջին օրը, երբ «Ելք»-ի տարբեր անդամներ բարձրաձայնել են, որ հրավեր չեն ստացել, բանավոր կերպով, զանգ է եղել, և տեղեկացրել են, որ հրավիրված են բոլոր խմբակցությունների ղեկավարները, հանձնաժողովների նախագահները, ԱԺ նախագահը, փոխնախագահները և ՀՀԿ գործադիր մարմնի ողջ կազմը:
«Բանավոր հրավերին արդեն մենք չենք արձագանքել: Փաստացի մենք ունենք ՀՀԿ գործադիր մարմին-Սփյուռք հանդիպում, որին հրավիրված էին պետական մարմնի որոշ ղեկավարներ: «Ելք»-ը երեք կուսակցությունների դաշինք է, և տրամաբանական կլիներ, որ ամեն կուսակցությունից ներկայացուցիչ հրավիրվեր, ելույթ լիներ օրակարգով, որպեսզի «Ելք»-ը կարողանար նաև իր մոտեցումները ներկայացնել Հայաստանի զարգացման, Հայաստան-Սփյուռք համագործակցության հետ կապված»,- ասաց Գորգիսյանը՝ հավելելով. «Միևնույն ժամանակ մենք ունենք Թուրքիայից հրավիրված պատգամավոր, որը այնտեղ հալածվում է այլակարծության համար: Հիմա փաստորեն նրան հրավիրել են Հայաստան՝ սատար կանգնելու նրա գործունեությանը, բայց փաստացի Հայաստանում ունենք մի վիճակ, երբ փակվում են ՀՀԿ-ից տարբերվող կարծիք ունեցողների բոլոր ճանապարհները»:
Գորգիսյանը նշեց, որ համաժողովի հրավիրյալներից, ելույթներից դատելով՝ իրենք մնում են այն կարծիքին, որ դա իշխանության PR-ի համար կազմակերպված միջոցառում էր, բայց միևնույն ժամանակ եղան սփյուռքահայեր, ովքեր իրենց հստակ վերաբերմունքը հայտնեցին Հայաստանի իշխանությունների նկատմամբ՝ քնելով Սերժ Սարգսյանի ելույթի ժամանակ, քննադատելով Հայաստանում ստեղծված անիրավ մթնոլորտը:
«Սփյուռքը փաստացի վաղուց կորցրել է վստահությունը Հայաստանի իշխանությունների նկատմամբ, և գործնական որևէ քայլ Հայաստանի իշխանությունները չեն արել այդ վստահությունը վերականգնելու ուղղությամբ: Պարզապես հերթական անգամ հրավիրում են գալ Հայաստան, գումար ծախսել, ներդրում անել՝ փաստացի որևէ քայլ չանելով, ներդրումային մթնոլորտ չձևավորելով: Իշխանությունները անգամ ցույց չեն տալիս, որ ցանկանում են ինչ-որ բան փոխել»,- նշեց պատգամավորը: