«Հատուկ գնդի» կազմավորման 27 տարվա առթիվ գնդի ազատամարտիկները այցելել են «Եռաբլուր» պանթեոն, ծաղիկներ դրել զոհված մարտական ընկերների ու սպարապետ Վազգեն Սարգսյանի շիրմաքարերին:
«Ազատամարտիկների դաշինքի» վարչության անդամ Գագիկ Մելքոնյանը «Առաջին լրատվական»-ի հետ զրույցում նշեց, որ մեծ խնդիրներ կան Արցախյան հիմնահարցի հետ կապված, այդ իսկ պատճառով բոլորը պետք է համախմբվեն՝ կուսակցությունների անդամներից մինչև ազատամարտիկներ:
«Հիմա սփյուռքահայերը այստեղ են, բոլորը պիտի միանան, ու մեր անվտանգությունը մենք պետք է պաշտպանենք, ոչ թե ինչպես որոշ լիդերներ խոսում են՝ մեր անվտանգության համար այս կամ այն պետք է տանք, էս ենք տվել: Ոչ, մեր անվտանգությունը մենք պիտի պահենք, համախմբվենք, ինչպես Արցախյան պատերազմում հաղթանակ տարանք, հիմա էլ»,- շեշտեց նա:
Անդրադառնալով ներքաղաքական հարցերին, մասնավորապես՝ իր կողմից հնչեցրած հայտարարությանը, թե Սերժ Սարգսյանը թող 2018-ին լինի վարչապետ և իրավիճակի պատասխանատվություն կրի, Գագիկ Մելքոնյանն ասաց. «Ես բառացի ասել եմ՝ մեկ ա, երկիրը ղեկավարելու է ՀՀԿ-ն, եթե Հանրապետական կուսակցությունն է, որի լիդերը Սերժ Սարգսյանն է, ով էլ դառնա վարչապետ, նույնն է լինելու. հիմա քանի վարչապետ ենք փոխել, ես ասել եմ, որ ՀՀԿ-ն է ղեկավարում: Սովետական Միության ժամանակ Բրեժնևը որ ղեկավարում էր, ինքը պաշտոնյա չէր, ինքը կուսակցության քարտուղար էր, պաշտոնյա չէր, հիմա էլ նույնն է՝ ՀՀԿ-ն է ղեկավարելու, որի լիդերը Սերժ Սարգսյանն է: Կուսակցությունը պիտի փոխվի, կուսակցությունն էլ չի փոխվի, որովհետև մեր ժողովուրդը միաձայն վստահել ա ՀՀԿ-ին. իր քվեով ժողովուրդը ապացուցեց, որ ՀՀԿ-ն ամենաուժեղն է»,- նշեց նա:
Մանրամասները՝ տեսանյութում: