«Ցավոք սրտի, Հայաստանում ստեղծվել է մի իրավիճակ, որ մի քանի տարվա ընթացքում բազմակի համաներումներ են հայտարարվել և դրանով փորձել են լուծել ՔԿՀ-ներում գերբնակեցման խնդիրը, այսինքն, որպեսզի համաներմամբ՝ գերբնակեցումը նվազի, բայց, եթե նորմալ գործեր մեր վաղաժամկետ ազատման ինստիտուտը, դատարանները բոլորին համատարած ազատազրկման որոշում չկայացնեին, այլև այլընտրանքային պատժատեսակներ կիրառեին, ապա մենք այդ գերբնակեցման խնդիրը չէինք ունենա։
Այնպես չէ, որ համաներման մասին նախապես իրազեկում են, այլ դա ինչ-որ տեղ պետք է լինի անսպասելի, որովհետև եթե այս կամ այն անձը գիտի, որ համաներում է լինելու, ապա կմտածեն, որ կարելի է օրինակ այսինչ բանն անել, քանի որ միևնույնն է համաներում է տարածվելու և իրենք կարող են ազատ արձակվել, այսինքն՝ համաներումը չպետք է նախապես հայտարարված լինի»,- «Առաջին լրատվական»-ի հետ զրույցում ընդգծեց ՀՀ ԱՆ ՔԿՀ-ներում հասարակական վերահսկողություն իրականացնող դիտորդների խմբի անդամ, փաստաբան Ռոբերտ Ռևազյանը՝ անդրադառնալով համաներման «ինստիտուտին»։
Նկատենք նաև, որ մամուլում օրերս լուրեր էին շրջանառվում այն մասին, որ այս տարի Անկախության տոնին ընդառաջ՝ սեպտեմբերի 21-ին, հնարավոր է, որ Սերժ Սարգսյանը համաներում չհայտարարի։
Ռոբերտ Ռևազյանի խոսքերով՝ համաներումն ինքնին շատ մարդասիրական քայլ է, սակայն խնդիրն այստեղ կայանում է նրանում, թե դրանով ի՞նչ խնդիր են փորձում լուծել։
«Եթե ուզում են լուծել այն հարցը, որը պետք է լուծեին դատարանները՝ այլընտրանքային պատիժ նշանակելով կամ վաղաժամկետ ազատ արձակման ինստիտուտի հարցը, ապա համաներումը դրա համար լավ ինստիտուտ չէ,այսինքն՝ մենք սխալ մոտեցում ենք որդեգրում, եթե փորձում ենք համաներմամբ լուծել մյուս մարմինների թերացումները, իսկ եթե զուտ որպես մարդասիրական քայլ ենք դա դիտարկում, ապա շատ լավ, այդ դեպքում այն կարող է դրական երևույթ համարվել»,- ասաց Ռևազյանը։
Վերջինիս գնահատմամբ՝ Հայաստանում այսօր դատարաններն առավել հակված են ազատազրկում կիրառել, այլընտրանքային պատիժ կամ չեն կիրառում կամ շատ քիչ են կիրառում, իսկ վաղաժամկետ ազատ արձակման հանձնաժողովն էլ, ըստ էության սկսել է ձևական բնույթ կրել՝ համատարած մերժումներ են միայն․ ըստ վիճակագրության էլ՝ չնչին տոկոս կա վաղաժամկետ ազատ արձակվածների, ինչն էլ փաստաբանի դիտարկմամբ՝ իր հերթին հանգեցնում է այլ խնդիրների։
Մանրամասները՝ տեսանյութում
