Շվեյցարական Սանկտ-Գալեն կանտոնի խորհրդարանը կողմ է քվեարկել հասարակական վայրերում դեմքը փակելու արգելքին։ Այս մասին փոխանցում է տեղի ATS գործակալությունը։
Օրենքի նախագիծն ընդունվել է առաջին ընթերցմամբ՝ 59 կողմ և 54 դեմ ձայներով։ Ենթադրվում է, որ արգելքը կվերաբերվի բոլորին, ովքեր փակում են իրենց դեմքը հասարակական վայրերում, ինչպես բուրքայով մուսուլման կանանց, այնպես էլ ցուցարարներին, ովքեր փակում են իրենց դեմքը բանդանայով՝ արցունքաբեր գազից չտուժելու համար։
Նոր օրենքի հեղինակը պահպանողական Ժողովրդական կուսակցության տարածաշրջանային բջջի ներկայացուցիչներն են։ Նշենք, որ կուսակցությունը մեծամասնություն է կազմում երկրի խորհրդարանում։
Շվեյցարիայի կառավարությունը դեռևս դեմ է հանդես գալիս երկրում բուրքայի կրման համընդհանուր արգելքի ներմուծմանը։