Լիտվայի նախագահ Դալյա Գրիբաուսկայտեն, ելույթ ունենալով ՄԱԿ-ի Գլխավոր ասամբլեայում, հայտարարել է, որ Ռուսաստանի և Բելառուսի համատեղ «Արևմուտք-2017» զորավարժությունները հանդիսանում են տեղեկատվական պատերազմի մաս և հարևան երկրների վրա Ռուսաստանի հարձակման փորձ։
«Այսօր աշխարհի ուշադրությունն ուղղված է դեպի Հյուսիսային Կորեա և այլ տարածաշրջաններ, սակայն շանտաժի և ագրեսիայի նույն մեթոդները կիրառվում են Ուկրաինայում և ՆԱՏՕ-ի արևելյան սահմանի երկայնքով։ Մոտ 100 հազար ռուս զինծառայողներ մասնակցում են «Արևմուտք-2017» հարձակողական բնույթի զորավարժություններին բալթյան պետությունների և Լեհաստանի սահմանների մոտ, նույնիսկ Արկտիկայում»,-նշել է Գրիբաուսկայտեն։
Նրա կարծիքով՝ Ռուսաստանը, անցկացնելով նման զորավաժություններ, փորձարկում է ագրեսիվ սցենարներ հարևան պետությունների դեմ՝ սովորեցնելով իր բանակին հարձակման։
Լիտվայի նախագահը կարծում է, որ ռուսական զորավարժությունները հանդիսանոում են տեղեկատվական պատերազմի մաս, որն ուղղված է վախի տարածմանը։
Գրիբաուսկայտեն ընդգծել է, որ զենքից բացի, Ռուսաստանի զինանոց են հանդիսանում սուտ նորություններն ու ագրեսիվ քարոզչությունը։
«Չնայած հատուկ պատասխանատվությանը, որը դրված է Ռուսաստանի վրա՝ միջազգայի խաղաղության պաշտպանությունը որպես ԱԽ մշտական անդամ, Ռուսաստանը խախտում է ՄԱԿ-ի կանոնադրությունը։ Այն հարձակվել է Վրաստանի վրա, ապօրինաբար բռնակցել Ղրիմը և անմիջականորեն մասնակցում է Ուկրաինայի արևելքում պատերազմին»,-ասել է Լիտվայի առաջնորդը։
Գրիբաուսկայտեի ելույթից առաջ ՌԴ պատվիրակությունը լքել էր դահլիճը։