Այս համաժողովում դրականն այն է, որ, այնուամենայնիվ, առաջացել են չորս թեմատիկ ուղղություններ, որոնցում կան ավելի բովանդակային քննարկումներ, և որոնք հնարավորություն են տալիս այդ ուղղությունների շրջանակներում որոշակի գործնական, մասնագիտական պլատֆորմներ ձևավորել և որոշակի գաղափարների սկիզբ տալ, և կարծում եմ՝ դա դրական է: «Առաջին լրատվական»-ի հետ զրույցում, անդրադառնալով Հայաստան-Սփյուռք 6-րդ համաժողովին, ասաց «Արար» հիմնադրամի խորհրդի նախագահ Ավետիք Չալաբյանը:
Մեծագույն բացը, նրա խոսքերով, որ կար մինչև համաժողովը, Հայաստանի և ներսփյուռքյան համայնքների միջև համագործակցության մի համընդհանուր պլատֆորմի բացակայությունն է. «Ցավոք, այդ պլատֆորմը գոյություն չունի մինչև հիմա, և համագործակցությունը տեղի է ունենում հատվածական, գուցե այդ պլատֆորմն իրականության մեջ ստեղծել հնարավոր էլ չէ, չգիտեմ, բայց, համենայնդեպս, դրա փորձը պետք է անել, որպեսզի մեր սփյուռքյան համայնքները պատկերացնեն, թե Հայաստանի հետ ինչպես են համագործակցում, ինչպես են տալիս, բայց նաև ինչպես են ստանում, դա շատ կարևոր է»,- ասաց նա՝ հավելելով, որ մենք ուզում ենք, որ սփյուռքը մասնակցություն ունենա Հայաստանի զարգացմանը, բայց այդ դեպքում պետք է պատասխան տալ հարցին, թե ինչպես է Սփյուռքն ազդում Հայաստանի զարգացման վրա, ինչպես է ազդում Հայաստանի քաղաքականության վրա, ինչպես է ազդում Հայաստանում կուտակված խնդրիների լուծման վրա: Այս հարցի պատասխանը, նրա խոսքերով, առայժմ չկա:
Անդրադառնալով Սերժ Սարգսյանի հայտարարությանը՝ 2040-ին 4 միլիոն բնակչություն ունենալու հետ կապված՝ Ավետիք Չալաբյանը նշեց, որ այդ թիվն իրատեսական չէ, մենք չենք կարող 23 տարվա ընթացքում մեկ միլիոնից ավելի բնակչով ավելանալ՝ այս պահին մոտ 2.8 միլիոն բնակչություն ունենալով: Ըստ նրա՝ որպեսզի բնակչությունն աճի, կյանքի պայմանները պետք է կտրուկ բարելավվեն:
Հարցազրույցն ամբողջությամբ՝ տեսանյութում:
