Դուք դրա պատասխանը շատ լավ գիտեք, երևի Ալավերդին իմ ծննդավայրն է, դրա համար են իմ անունը այդ դեպքերի հետ կապում: Այս մասին «Առաջին լրատվական»-ի հետ զրույցում ասաց Լոռու մարզպետ Արթուր Նալբանդյանը՝ անդրադառնալով հարցին, թե Վերնիսաժում տեղի ունեցած մահվան ելքով դեպքի հետ ի՞նչ կապ ունի, քանի որ մամուլը այն կապում է 2015-ին Ալավերդու ընտրությունների հետ. նշվում է, որ Վերնիսաժում վիրավորված Ալավերդիում քրեական հեղինակություն համարվող Վահագն Աբգարյանը մարզպետի մտերիմներից է:
«Ալավերդին փոքր քաղաք է, բացի նոր սերնդից՝ ես այնտեղ գրեթե բոլորին ճանաչում եմ: Ես ՀՀԿ մարզային տարածքային ղեկավարն եմ և բնականաբար ցանկացած ընտրության իմ մասնակցությունը ունենում եմ: Եթե ընտրություններին յուրաքանչյուր մարդ մասնակցություն է ունենում, և իր անվան հետ որոշ սուտ լուրեր պետք է տարածվեն, ապա բոլորի հետ կապված պետք է տարածվեն»,- շեշտեց նա: