ԱՄՆ պետքարտուղար Ռեքս Թիլերսոնը խոստովանել է, որ Իրանը պահպանում է միջուկային գործարքի պայմանները։ Դրա հետ մեկտեղ Թեհրանն ապակայունացնում է իրավիճակը Սիրիայում և Եմենում՝ զենք մատակարարելով «Հըզբոլլահին» և այդ երկրում ահաբեկչական շարժումներին՝ հայտարարել է Թիլերսոնը CNN-ի եթերում։
«Հենց միջուկային ծրագրի շուրջ համաձայնագիրը կնքվեց, մենք տեսանք, որ Իրանն ընդլայնեց իրավիճակի ապակայունացմանն ուղղված իր գործունեությունը»,-ասել է ԱՄՆ պետքարտուղարը։
Հուլիսին ԱՄՆ-ը պատժամիջոցներ էր սահմանել Իրանի դեմ՝ սև ցուցակում ներառելով Իսլամական հանրապետության 18 քաղաքացու և կառույց։ Դրան ի պատասխան՝ Իրանի նախագահ Հասան Ռուհանին հայտարարել էր, որ պատժամիջոցների խստացման դեպքում իր երկիրը հաշված ժամերի ընթացքում դուրս կգա միջուկային խնդրով Գործողությունների համատեղ համապարփակ պլանի մասին համաձայնագրից։