«Հայկական ժամանակ» թերթը գրում է. «Նախկին վարչապետ Հովիկ Աբրահամյանը կարողանում է ազդել Երևանի քաղաքապետարանում կայացվող որոշումների վրա: Armtimes.com-ին տեղեկություններով՝ Հովիկ Աբրահամյանը պահանջել է շինթույլտվություն չտալ այն անձանց, որոնք իր շքեղ առանձնատան դիմաց ցանկանում են տներ կառուցել:
Նույն աղբյուրի փոխանցմամբ՝ քաղաքապետարանը թույլ չի տալիս Երևանի Ազատության պողոտայում, Հովիկ Աբրահամյանի առանձնատան դիմացի հողակտորների սեփականատերերին տուն կառուցել, և դա պատճառաբանվում է նրանով, որ Հովիկ Աբրահամյանն է դրան դեմ: «Գնացեք իր հետ ձեր հարցերը լուծեք, նոր կգաք»,- նման կերպ մերժում են սեփականատերերի նախագիծը: Ավելի պարզ ասած՝ Աբրահամյանի հետ պետք է մարդիկ քննարկեն շինթույլտվության հարցը, նոր դիմեն քաղաքապետարան: Այս կերպ մի նախագիծ արդեն իսկ մերժվել է:
Մեզ չհաջողվեց պարզել, թե ովքեր են կառուցապատողները, սակայն պարզեցինք, որ մոտ վեց հոգի են սեփականատերերը, որոնց ձեռք բերած հողակտորները, ընդհանուր առմամբ ավելի քան 3 հազար քառակուսի մետր է:
Նշենք, որ Հովիկ Աբրահամյանի առանձնատունը Ազատության պողոտայից մոտ 150 մետր հետ է և եթե նշված տարածքում տներ կառուցեն, ապա Աբրահամյանի տունը կհայտնվի այդ տների թիկունքում, կփակվի Աբրահամյանների առանձնատնից դեպի Հաղթանակի զբոսայգի տեսարանը»:
Առավել մանրամասն՝ թերթի այսօրվա համարում:
