Իրանի և Թուրքիայի գլխավոր շտաբերի ղեկավարներ, գեներալ-մայոր Մուհամմադ Հուսեյն Բաքերին և բանակի գեներալ Հուլուսի Աքարն, իրենց անհանգստությունն են արտահայտել՝ կապված Իրաքյան Քրդստանի անկախության հարցով հանրաքվեի հնարավոր բացասական հետևանքների հետ։ Այս մասին փոխանցում է Tasnim գործակալություն։
Հեռախոսազրույցի ընթացքում կողմերը նշել են, որ հանրաքվեն բացասաբար կազդի տարածաշրջանի բնակչության շահերի վրա։ Նրանք ընդգծել են, որ այդ քայլը սպառնում է տարածաշրջանային անվտանգությանը, խաղաղությանն ու կայունությանը։
Նրանք հանդես են եկել հարևան երկրների միջև գործողությունների համակարգման անհրաժեշտության օգտին՝ հանրաքվեին դիմակայելու և տարածաշրջանում անջատողական դավադրությունները կանխելու գործում, որոնք կարող են առաջացնել բազմաթիվ քաղաքական, սոցիալական խնդիրներ և անվտանգության սպառնալիք։
Գեներալները քննարկել են նաև երկու երկրների զինված ուժերի միջև համագործակցության ամրապնդման հեռանկարները։