Ուրախ եմ, որ մոտենում ենք այն պահին, երբ պետք է ստորագրենք ՀՀ-ԵՄ համագործակցության համաձայնագիրը։ Այն լիովին համադրելի է Հայաստանի ստանձնած այլ պարտավորությունների հետ։ Այս մասին այսօր կայացած ասուլիսի ժամանակ նշեց ՀՀ-ում ԵՄ պատվիրակության ղեկավար, դեսպան Պյոտր Սվիտալսկին:
Հարցին, թե ինչո՞ւ չի հրապարակվում համաձայնագրի տեքստը, դեսպանը նշեց, որ այն մինչև ստորագրումը գաղտնի է և այստեղ զարմանալու որևէ բան չկա։ «Տեքստը գաղտնի է։ Սա սովորական աշխատակարգ է։ Երբ ԵՄ-ն բանակցում է երկկողմ համաձայնագրերի շուրջ, այդ փաստաթղթերը մնում են գաղտնի մինչև ստորագրման պահը»,- նշեց նա:
Դեսպանն ասաց, որ համաձայնագիրը չհրապարակելու մի քանի պատճառ կա։ Առաջինն այն է, որ համաձայնագիրը համարվում է նախագիծ, քանի դեռ այն ստորագրված չէ, անգամ նախագիծ է համարվում այն պարագայում, երբ նախաստորագրվել է: Երկրորդ պատճառն, ըստ դեսպանի, այն է, որ տեղի է ունենում դիվանագիտական գործընթաց, որը պետք է գաղտնի լինի։ Դեսպան Սվիտալսկին կոչ արեց լինել համբերատար: