«ԵԱՏՄ-ից ինչքան հեռու, այնքան լավ։ Մենք առաջին օրվանից, ի տարբերություն այլոց, դեմ էինք ԵԱՏՄ-ին, սեպտեմբերի 5-ին բաց հարթակ-հանրահավաք հրավիրեցինք։ Ուրախ եմ, որ այսքան տարի հետո «Ելք»-ի մեր գործընկերները միացան մեր տեսակետին։
Նախորդ խորհրդարանում նույնիսկ «Ժառանգության» ցուցակով ընտրված «Ազատ դեմոկրատների» հարգելի նախագահ Խաչատուր Քոքոբելյանը նախագիծ առաջ քաշեց, բայց Նիկոլ Փաշինյանը դեմ էր։ Կամ Էդմոն Մարուքյանը ժամանակին ասում էր, որ ԵԱՏՄ-ից պետք է օգուտներ քաղենք։ Արամ Սարգսյանն ինչպես դեմ էր, այդպես էլ մնացել է։ Եթե իրենց մոտեցումները փոխել են, միայն դրական կարող եմ գնահատել»,- «Առաջին լրատվական»-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը՝ ի պատասխան մեր այն հարցի, թե արդյոք «Ելք»-ի հետ տեսնո՞ւմ է համագործակցության հնարավորություն ԵԱՏՄ-ից դուրս գալու հարցի շուրջ։
Շարունակելով իր միտքը՝ Մարտիրոսյանն ընդգծեց. «Հայաստահի համար դրական եմ գնահատում այն, որ խորհրդարանում կա այլընտրանքային կարծիք, որ մենք պետք է ԵԱՏՄ-ից դուրս գանք»։
Մեր զրուցակցի կարծիքով՝ 3.5 տարի ամբողջ Հայաստանը՝ իշխանական ու ընդդիմադիր ուժերով, կողմ էր Եվրամիության հետ ԽՀԱԱԳ համաձայնագրի ստորագրմանը, իսկ հետո մեկ գիշերվա մեջ իրենց կարծիքը փոխեցին. «Այդ ուժերը չունեն սեփական քաղաքական գիծ, որոշում է մեկ անձ, իսկ մնացածը ենթարկվում են այդ մեկ անձի որոշմանը։ Եթե քաղաքական ուժը կարծիք է փոխում մեկ հոգուն զուգահեռ, նշանակում է, որ այդ մեկ հոգուն սպասարկող կառույց է, ոչ թե քաղաքական ուժ»,- ասաց Մարտիրոսյանը։
Հարցազրույցն ամբողջությամբ՝ տեսանյութում:
