Չեմպիոնների լիգայի 2017/2018թթ. խաղարկության խմբային փուլի մեկնարկը գոլառատ էր՝ դիտարժան: Տպավորիչ հաղթանակներ տարան «Բարսելոնան», «Մանչեսթեր Սիթին», «Մանչեսթեր Յունայթեդը», ՊՍԺ-ն… Ամենախոշոր հաշվով հաղթանակը տոնեց «Չելսին»՝ Լոնդոնում 6:0 հաշվով առավելության հասնելով Ադրբեջանի չեմպիոն «Ղարաբաղի» նկատմամբ: Գրանցված հաշիվը թերևս ամենալայն արձագանքը գտավ մեր երկրում: Բոլորը ցնծում են, որ Ադրբեջանի չեմպիոնը ձախողվել է:
Սոցիալական կայքերում հայ օգտատերերի շարքերում կարծես մրցում լինի, թե ով ավելի սրամիտ գրառում կանի «Ղարաբաղի» պարտության վերաբերյալ: Օրինակ՝ Հայաստանի ազգային հավաքականի նախկին կիսապաշտպան Լևոն Պաչաջյանը Լոնդոնում կայացած հանդիպման ժամանակ երբ հաշիվը դարձել էր 5:0, ֆեյսբուքյան իր էջում գրել էր. ««Չելսիում» հայ ֆիդայիներ են խաղում։ «Ղարաբաղին», հին հայկական ավանդույթի համաձայն, մզցնում են 5-0»:
Բնական է, որ ցանկացած հայ մարդ չի ցանկանա, որ «Ղարաբաղ» անունը կրող ադրբեջանական թիմը հաղթի: Բնական երևույթ է, երբ մասնավորապես սպորտի ասպարեզում համեմատում ենք մեր և հարևան երկրների ներկայացուցիչների ելույթները: Հատկապես ֆուտբոլում տարիներ առաջ մենք մի գլուխ բարձր էինք Ադրբեջանից, և այս երկրի թիմերի, հավաքականների ձախողված ելույթները սովորական էին: Այսօր երբ հայկական ֆուտբոլը հոգեվարքի մեջ է, «Ղարաբաղի» ելույթը չարախնդալն ու ծաղրելը ուղղակի ծիծաղելի է:
Ընդամենը 10 օր առաջ Երևանում «մզցրին» Հայաստանի ազգային հավաքականին: Կարծում ենք՝ «Ղարաբաղի» ձախողումը տոնի վերածած մեր հայրենակիցները ճիշտ կանեին, Ադրբեջանի չեմպիոնին ձեռք առնելու և հեգնելու փոխարեն, պատասխան պահանջեին մեր ֆուտբոլը «մզցնողից»: Հայաստանի հավաքականին ամենևին Դանիան կամ Ռումինիան չեն «մզցրել»: «Մզցրել» են ֆուտբոլի գլխին կանգնած մարդիկ, «մզցրել» ենք մենք, որ այսքան տարի հանդուրժել ենք այս վիճակը:
Ու մինչ մենք ուրախանում ենք, որ «Ղարաբաղին» «մզցրին»՝ հայկական ֆուտբոլին «մզցնող» ու «մզցնողները» շարունակում են իրենց գործը: Եվս մեկ խնդիր, որը վրիպել է «Ղարաբաղին» ծաղրող մեր հայրենակիցների ուշադրությունից: «Չելսիի» հետ հանդիպումից հետո տեղի ունեցած մամուլի ասուլիսի ժամանակ «Ղարաբաղի» գլխավոր մարզիչ Գուրբան Գուրբանովը հայտարարել էր. «Ցավոք, ղարաբաղյան հողերի մեծ մասը գտնվում է հայ դաշնակների ձեռքերում»:
Գուրբանովի այս հայտարարությունը որևէ արձագանք չի գտել ակտիվ հասարակության շրջանում: Եվրոպական ամենահեղինակավոր մրցաշարում նման հայտարարություն անողից, կարծում ենք, արժեր պատասխան պահանջել: Երբ Ռուսաստանի երկրորդ դիվիզիոնում Մոսկվայի «Արարատի» հանդիպման ժամանակ ծածանվել էր Արցախի դրոշը, ադրբեջանցիները մեծ աղմուկ բարձրացրին, իսկ այս երկրի ֆուտբոլի ֆեդերացիան պաշտոնական նամակ հղեց Ռուսաստանի ֆուտբոլի միությանը՝ պահանջելով պատժել հայկական ակումբին: Ադրբեջանցիները հետևողականորեն քայլեր են ձեռնարկում, չեղած տեղից աղմուկ բարձրացնում՝ փորձելով միջազգային հանրությանն ինչ-որ բան ապացուցել:
Չունենալով ֆուտբոլ՝ մենք հրճվում ենք «Ղարաբաղի» պարտությամբ՝ ֆեյսբուքյան էջերում սրամտելով և մեկս մյուսին շնորհավորելով: Ցավալի է, բայց այսօր, երբ Հայաստանի բարձրագույն խմբի առաջնությունում մասնակցում է 6 թիմ, որոնք շարունակ խայտառակվում են եվրագավաթների խաղարկությունում, երբ Հայաստանի ազգային թիմին շարունակ նվաստացնում են աշխարհի առաջնության ընտրական փուլում, մեր միակ ուրախությունը դարձել է «Ղարաբաղը»: Վերջինս Չեմպիոնների լիգայի ընթացիկ խաղարկությունում բավական ուժեղ ենթախմբում է: Բացի «Չելսիից»՝ հարևան երկրի չեմպիոնը մրցելու է նաև Մադրիդի «Ատլետիկոյի» և «Ռոմայի» հետ: Ուստի մեր հայրենակիցները առաջիկա ամիսներին ուրախանալու և ցնծալու ևս մի քանի առիթներ կունենան:
Ֆեյսբուքյան օգտատեր Վիլեն Գաբրիելյանը՝ Նավակ Ճոճողը, անդրադառնալով «Ղարաբաղի» պարտությանը, գրել էր. «Գնացեք քնեք, որովհետև մեր միակ ուրախությունը «հարևանի» ֆուտբոլային խայտառակությունն էր»:
