Լուրեր
«Ամեն ինչ որոշվում է Վճռաբեկ դատարանի նախագահի կողմից»․ Ռուբեն Սահակյան
  • 13:21
  • 2017-09-14
  • Դիտումներ՝ *

«Ես  զարմանում եմ, թե ինչպես կարելի է նման կերպ վարվել․ ախր դու բարձրադիր մարմին ես,  իշխանության ճյուղերից մեկն ես, գուցե ոմանք ինձ քննադատեն՝ ասելով, որ այդ ցանկը  Վճռաբեկ դատարանը չի ընդունել, այլ ԴՆԽ-ն է ընդունել, բայց  գիտեք՝ ամեն ինչ էլ լուծվում է Վճռաբեկ դատարանի նախագահի  կողմից: Ես գտնում եմ, որ այդ ցանկը Վճռաբեկ դատարանի նախագահի նախաձեռնությունն է։ Ես սա անվանում եմ թղթոն․ամոթ է, որ ԴՆԽ-ն  նման փաստաթուղթ է  ընդունում»,- «Առաջին լրատվական»-ի հետ զրույցում շեշտեց Փաստաբանների պալատի նախկին նախագահ Ռուբեն Սահակյանը՝ անդրադառնալով սեպտեմբերի 12-ին ՀՀ դատարանների նախագահների խորհրդի կողմից հրապարակված արգելված իրերի ցանկին։

Վերջինիս գնահատմամբ՝  հրապարակված այդ ցուցակը  չի կարող որևէ փաստաբանի համար գոհացուցիչ լինել։

Հիշեցնենք նաև, որ այդ ցուցակում մասնավորապես նշված է, որ դատարանի դահլիճ չեն կարող բերվել կացիններ, նետեր, սրեր, թրեր, գործելու շյուղեր, ենթամաշկային ներարկման ասեղներ, նավակի թիեր, բիլյարդի կիեր, հոկկեյի թիեր, գոլֆի կիեր, ձկնորսական կարթեր, ձկներ, սողուններ, թռչուններ, միջատներ, ցանկացած տեսակի կենդանիներ և  նման  մի շարք այլ առարկաներ։

Նկատենք նաև, որ  հրապարակված այդ ցուցակը մի խումբ  փաստաբանների  կողմից ծաղրի ենթարկվեց։

Հարցին՝ ինչպե՞ս պետք է կարգավորվի այդ զննությունների կամ խուզարկությունների խնդիրը,  Ռուբեն Սահակյանը պատասխանեց․

«Որպեսզի գործընթացը չտորպեդահարվի, այսքան չձգձգվի, ուրեմն թող հայթհայթեն միջոցներ, թող մի բարերար գտնեն և սկան անող մի  սարք տեղադրեն և դրանով  հարցերը կլուծվեն։

Այդպիսի մի սարք մենք ունենք Վերաքննիչ դատարանում , բայց ասում են չի աշխատում, խափանված է, ապա գուցե միջոցներ հայթահայթեն  այդ սարքի խափանումը վերացնեն, դա շատ ավելի  մատչելի կլինի բյուջեի  համար»։

Նշենք նաև, որ ՓՊ-ի նախագահ Արա Զոհրաբյանը պնդում է, որ  փաստաբանների նկատմամբ իրականացվում է ոչ թե  խուզարկություն, այլ զննություն։

Ռուբեն Սահակյանը Արա Զոհրաբյանի նման դիրքորոշումը տվյալ խնդրի նկատմամբ համարեց անթույլատրելի։

«Թող Արա Զոհրաբյանը մի նորմատիվ ակտի վրա հղում անի, թե ինչու է այդպես կարծում , ես էլ կասեմ՝ այո, ճիշտ է ասում»,-ասաց ՓՊ-ի նախկին նախագահը։

 

Մանրամասները՝ տեսանյութում։ 

  • Դիտումներ՝ *