Գորիսի քաղաքապետ Վաչագան Ադունցը երեկ ավագանու նիստը վարելուց անմիջապես հետո շատ արագ հավաքել է իրերը և առանց որևէ մեկի հետ շփվելու, հեռացել է քաղաքապետարանի շենքից: Ավագանու նիստի ժամանակ ավագանու 15 անդամներից 13 հաստատել են քաղաքապետի հրաժարականի դիմումը: Դեմ են արտահայտվել միայն ավագանու երկու անդամ, ովքեր արդեն նախկին քաղաքապետ Վաչագան Ադունցի ազգականներն են՝ քրոջ երեխաներն են:
Ավագանու կողմից քաղաքապետի հրաժարականի դիմումի ընդունումից հետո այն ուղարկվել է մարզպետարան, և, թերևս, կառավարության վաղվա նիստում քաղաքապետի հրաժարականը կհաստատի վարչապետը, որից հետո կնշանակեն քաղաքապետի արտահերթ ընտրություններ:
Գորիսի մեր աղբյուրի խոսքերով՝ Ադունցը շատ նեղացած է հեռացել: Նա իր պարտականությունները մաքսիմում է կատարել, սակայն արժանացել է նման վերաբերմունքի: Նրան պարզապես կանչել են կառավարություն և ասել, որ պետք է դիմում գրի և հեռանա: «Դա նվաստացուցիչ է Ադունցի համար: Նա շատ նվիրված քաղաքապետ էր, բայց, ինչպես երևաց, գնահատվում է, ոչ թե աշխատանքը, այլ նախընտրական հաշիվներն ու խոստումները: Այս երկրում ոչ մի բան չի գնահատվում: Փոխարենը՝ բոլորն ինչ-ինչ պատճառներով հիվանդանում եմ, առողջանում են: Եթե իրենց լավ չեն պահում՝ ավելի են հիվանդանում: Սա է մեր իրականությունը»,- ասաց մեր զրուցակիցը:
Հիշեցնենք, որ Գորիսի քաղաքապետ Վաչագահ Ադունցը հրաժարականի դիմում էր գրել առողջական խնդիրներ ունենալու պատճառաբանությամբ:
Ինչ վերաբերում է քաղաքապետի նոր թեկնածուին, ապա մեր զրուցակիցն ասաց, որ Առուշ Առուշանյանի թեկնածությունը վերջնական է: «Տեղը հենց նրա համար էլ ազատեցին: Դա վերջնական որոշում է»,- ասաց մեր զրուցակից գորիսեցին:
Առուշ Առուշանյանը հրաշալի հարաբերությունների մեջ է մարզպետ Վահե Հակոբյանի հետ:
Վաչագան Ադունցը երեկ ամբողջ օրվա ընթացքում այդպես էլ չպատասխանեց մեր հեռախոսազանգերին: