Լուրեր
Բաղրամյան 26-ից են հանձնարարել. Զարուհի Փոստանջյանը չի միանա ԵԱՏՄ-ից դուրս գալու «Ելք»-ի առաջարկին
  • 17:43
  • 2017-09-12
  • Դիտումներ՝ *

«Առաջին լրատվական»-ի զրուցակիցն է «Երկիր Ծիրանի» կուսակցության նախագահ Զարուհի Փոստանջյանը։

-«Ելք» դաշինքը ԵԱՏՄ-ից դուրս գալու հայտարարության նախագիծ է ներկայացրել։ Դուք ևս դեմ էիք Հայաստանի՝ ԵԱՏՄ անդամակցելու որոշմանը, խորհրդարանում դրան դեմ եք քվեարկել։ Այս փուլում «Ելք»-ին աջակցելու հնարավորություն տեսնո՞ւմ եք։

-Իհարկե ո՛չ։ Հասկանալի է, որ այդ մարդիկ, ովքեր այդ նախագիծը ներկայացրել են, շուրջ մեկ տարի առաջ դրան դեմ էին։ Սա կեղծ գործընթաց է, որն ուղղորդվում է Բաղրամյան 26-ից և ելքեր է ստեղծում Սերժ Սարգսյանի համար։ Հետևաբար մենք նման կեղծ գործընթացներին չենք մասնակցում։

-Այսինքն՝ կարծում եք, որ անձամբ Սերժ Սարգսյանն է ուզում, որ Հայաստանը դուրս գա ԵԱՏՄ-ից ու դա անում է «Ելք»-ի միջոցո՞վ։

Չեմ կարծում, որ նա ցանկանում է դուրս գալու որոշում կայացներ, եթե ցանկանար՝ ընդհանրապես այդ նախագծին չէր միանա։ Սա ուղղակի մեթոդ է, որ նա կիրառում է որպես բոլշևիկ, սա շանտաժի միջոց է։ Որևիցե այլ ցանկություն այստեղ իհարկե չկա։

-«Ելք»-ում ևս այս հարցի շուրջ նախկինում տարակարծություններ կային, բայց չե՞ք կարծում, որ գուցե այս ընթացքում իրենք էլ քննարկել ու միասնական կարծիքի են եկել։

Այդպես չեմ կարծում, սա միանշանակ ուղղորդված ու կեղծ գործընթաց է։ Իրենք այդ արժեհամակարգը կրողը չեն, ինչպես Բաղրամյան 26-ից հանձնարարում են՝ այդպես էլ գործում են։ Կեղծ գործընթացներով հանրությանը խաբել չի կարելի, մենք նման արատավոր երևույթներին դեմ ենք։

 

Հարցազրույցն ամբողջությամբ՝ տեսանյութում։

  • Դիտումներ՝ *