ԱՄՆ սենատի Հատկացումների հանձնախումբը վավերացրել է Արցախի և Հայաստանի վերաբերյալ մի շարք որոշումներ։ Դրանցից մեկի համաձայն, Հայաստանի տրամադրվող օժանդակությունն ավելանում է՝ հասնելով 20.7 մլն դոլարի: Մեկ այլ որոշմամբ, հանձնախումբը Թուրքիային և Ադրբեջանին զենք վաճառելու սահմանափակումներ է դրել՝ միաժամանակ շեշտելով Արցախի իշխանություններին ուղղակի օժանդակություն տրամադրելու կարևորությունը։
Օրինագիծն առաջ են քաշել սենատորներ Քրիս Վան Հոլընն ու Փեթրի Լիհինը: Հայաստանի օժանդակության համար առաջարկված գումարը 14 միլիոնով գերազանցում է նախագահ Թրամփի առաջարկը: ԱՄՆ սենատի Հատկացումների հանձնախմբի այս որոշումները կարևոր քաղաքական նշանակություն ունեն, որովհետև ֆինանսական օգնությունների կամ սահմանափակումների միջոցով Վաշինգտոնն, ըստ էության, ուրվագծում է իր տարածաշրջանային քաղաքականությունը, վերաբերմունքն այս կամ այն երկրի հանդեպ: Սա ամերիկյան վերնախավի քաղաքական արձագանքն է Ադրբեջանում և Թուրքիայում խորացող ավտորիտար միտումներին, Անկարայի և Բաքվի ագրեսիվ արտաքին քաղաքականությանը:
ԱՄՆ արտաքին քաղաքականության մեջ գնալով ավելանում է Հայաստանի կարևորությունը և սրա խոսուն դրսևորումն այն է, որ Սենատի կողմից Հայաստանի օժանդակության համար առաջարկված գումարը 14 միլիոնով գերազանցում է նախագահ Թրամփի նախատեսածը: Այս բարենպաստ ֆոնի ձևավորման վրա, անշուշտ, դրական ազդեցություն ունի ամերիկահայ լոբբիստական կազմակերպությունների գործունեությունը, որոնք ավանդաբար ավելի արդյունավետ են աշխատում ամերիկյան օրենսդիր պալատների՝ Կոնգրեսի և Սենատի հետ:
Մյուս կողմից` պետք չէ անտեսել տարածաշրջանում ստեղծված համատեքստը, որը չի կարող ազդեցություն չունենալ Վաշինգտոնի քաղաքականության վրա` որքան էլ դրանում տակավին մեծ է մնում անորոշության գործոնը: Այս գործընթացներում առկա է մեկ այլ կարևոր հանգամանք, որի վրա անհրաժեշտաբար ուշադրություն պետք է դարձնեն Երևանում` հատկապես, որ մյուս տարվա ապրիլից Հայաստանն ամբողջովին անցում է կատարում խորհրդարանական կառավարմանը:
Թրամփի նախագահության ամիսներին, հատկապես` Ռուսաստանի դեմ նոր պատժամիջոցներ սահմանող օրինագծի ընդունումից հետո, ամերիկյան արտաքին քաղաքականության ձևավորման վրա շեշտակի մեծացել է Կոնգրեսի ազդեցությունը, եթե չասենք, որ Թրամփի վարչակազմն, ըստ էության, զրկվել է մանևրելու կամ սկզբունքային հարցերում ինքնուրույն որոշումներ կայացնելու հնարավորությունից: Սա ազդակ է Հայաստանի համար խթանել խորհրդարանական դիվանագիտության զարգացումն և ակտիվ աշխատանք տանել ԱՄՆ Կոնգրեսի հետ, մանավանդ` դրա կարևորությունը հատուկ ընդգծել էր նաև դեսպան Ռիչարդ Միլսը, երբ ընտրություններից հետո այցելել էր Հայաստանի խորհրդարան: Հայաստանի և ԱՄՆ-ի միջև խորհրդարանական կայուն և արդյունավետ հարաբերությունների ստեղծումը պետք է առաջնահերթություն հռչակվի նաև հայկական լոբբիստական կազմակերպությլւնների վրա, մանավանդ, որ այդ հանգամանքն անուղղակիորեն իր դրական ազդեցությունն է ունենալու նաև ԼՂ խնդրի կարգավորման գործընթացի վրա:
