Չինաստանի հետ ռազմատեխնիկական համագործակցությունը զարգացնելը Հայաստանի ինքնիշխան իրավունքն է՝ այսօր՝ սեպտեմբերի 12-ին, ՀՀ բնապահպանության նախարարությունում կազմակերպված միջոցառումից հետո լրագրողների հետ զրույցում ասաց Հայաստանում Ռուսաստանի արտակարգ և լիազոր դեսպան Իվան Վոլինկինը:
«Առաջին լրատվական»-ի հարցը Ռուսաստանի դեսպանին վերաբերում էր Հայաստանի պաշտպանության նախարար Վիգեն Սարգսյանի պաշտոնական այցին Չինաստան և հայ-չինական բանակցություններին՝ ռազմաքաղաքական և ռազմատեխնիկական հարաբերությունները զարգացնելու շուրջ: Եվ քանի որ ռուսական որոշ լրատվամիջոցներ, մասնավորապես՝ «ՌԻԱ Նովոստի» լրատվական գործակալության կայքը, քննադատել էին այդ փաստը («ՌԻԱ Նովոստի»-ի հոդվածի մասին կարդացեք այս հղումով), դեսպան Վոլինկինին խնդրեցինք հայտնել Ռուսաստանի պաշտոնական դիրքորոշումը Հայաստանի և Չինաստանի ռազմատեխնիկական համագործակցության վերաբերյալ՝ նկատի ունենալով այն հանգամանքը, որ Ռուսաստանը Հայաստանի ռազմավարական դաշնակիցն է և հիմնական գործընկերը ռազմական ոլորտում:
Դեսպանը նախ պատասխանեց, թե չի տեսել որևէ քննադատություն՝ ակնարկելով, որ նշված հոդվածը հեռացվել է ria.ru կայքից. «Որտե՞ղ է «ՌԻԱ Նովոստի»-ի հոդվածը: Ցո՛ւյց տվեք: Չկա՛ այդպիսի հոդված: Ինչո՞ւ պիտի մեկնաբանենք մի բան, որը չկա»:
Հետո ավելացրեց հետևյալը. «Դա Հայաստանի ինքնիշխան իրավունքն է զարգացնել համագործակցություն՝ ում հետ ուզում է: Հայաստանը և Ռուսաստանը բարեկամ երկրներ են: Չի կարելի բարեկամություն անել ինչ-որ մեկի դեմ: Դա սրտից է բխում: Իսկ եթե ինչ-որ մեկի դեմ է, ապա դա արդեն բարեկամություն չէ»:
Հայաստանում Ռուսաստանի դեսպանն անդրադարձավ նաև ՀՀ ԱԺ «Ելք» խմբակցության նախաձեռնությանը՝ Հայաստանի Հանրապետության անդամակցությունը Եվրասիական տնտեսական միությանը (ԵԱՏՄ) դադարեցնելու գործընթաց սկսելու վերաբերյալ:
«Եթե նրանք ուզում են առաջ քաշել այդ նախաձեռնությունը, խնդրեմ, ոչ ոք նրանց չի խանգարում: Այլ հարց է, թե որքանո՞վ է դա պետք Հայաստանին: Կարծում եմ, որ Հայաստանի բնակչության մեծամասնությունը համաձայն չէ այդ նախաձեռնությանը, քանի որ նրանք տեսնում են Եվրասիական տնտեսական միությանը անդամակցելու ակնհայտ առավելությունները»,- մեկնաբանեց դեսպան Իվան Վոլինկինը:
Դիվանագետը հրաժարվեց մեկնաբանել Ռուսաստանի նախագահ Վլադիմիր Պուտինի քննադատությունը Ուկրաինային ամերիկյան զենք մատակարարելու կապակցությամբ, մասնավորապես այն հարցը, թե Պուտինի այս հայտարարությունը չի՞ հակասում Ռուսաստանի քաղաքականությանը Հարավային Կովկասում, որովհետև Ռուսաստանը մի կողմից՝ քննադատում է այլ երկրների կողմից զենքի մատակարարումը Ուկրաինային, իսկ մյուս կողմից՝ մի քանի միլիարդ դոլարի արժողությամբ զենք է վաճառել Ադրբեջանին: «Ազատություն» ռադիոկայանի այս հարցին դեսպան Վոլինկինը պատասխանեց, թե իր կողմից՝ որպես դիվանագետի, Էթիկապես սխալ կլինի մեկնաբանել սեփական երկրի նախագահի խոսքերը:
«Դուք այլ թեմաներ չունե՞ք: Դուք ամեն անգամ նույն հարցն եք տալիս: Ինչքա՞ն կարելի է դրա մասին խոսել: Այստեղ ամեն ինչ պարզ է, Ռուսաստանի բոլոր ղեկավարներն արդեն հայտնել են իրենց տեսակետն այդ հարցի վերաբերյալ: Ես այդ թեմայի մասին չեմ խոսելու: Մի՞թե այլ հարցեր չունեք»,- ավելացրեց Հայաստանում Ռուսաստանի դեսպանը:
Ռուսաստանի նախագահը սեպտեմբերի 5-ին ԲՐԻԿՍ-ի գագաթնաժողովի ամփոփիչ ասուլիսի ընթացքում հայտարարել էր, թե Միացյալ Նահանգների կողմից զենքի մատակարարումը Ուկրաինային միայն կխորացնի կոնֆլիկտը Ուկրաինայի արևելքում և կհանգեցնի զոհերի թվի աճին:
