Կոլումբիայում ՌԴ դեսպանատունը հաստատել է ՌԴ քաղաքացի Արսեն Ոսկանյանի մահվան մասին տեղեկությունը, ով անհետացել էր 2016 թվականի նոյեմբերին։
«Գոյություն ունեն տարբեր վարկածներ առ այն, թե ինչ է տեղի ունեցել։ Ակնհայտ է մի բան՝ պարոն Արսեն Ոսկանյանը մահացել է։ Ենթադրաբար, գերությունից փախչելու փորձի ժամանակ»,-ասվում է դեսպանատան հաղորդագրությունում։
Ավելի վաղ հաղորդվել էր, որ 2016 թվականին Կոլումբիա մեկնած Արսեն Ոսկանյանը սպանվել է Ազգային ազատագրական բանակի գրոհայինների գերությունից փախչելու փորձի ժամանակ։ Արսեն Ոսկանյանի եղբյարը՝ Արմենը, rusarminfo-ին տված հարցազրույցում պատմել է այն մասին, որ մինչ Կոլումբիա մեկնելն Արսենը Մոսկվայում զբաղվել է ձեռնարկատիրական գործունեությամբ, իսկ ավելի վաղ ծառայել Հայաստանի ԶՈւ դեսանտային ստորաբաժանման կազմում։ Վերջին տարիներին տղամարդը տառապել է միջերկրածովյան տենդով։
