«Առաջին լրատվական»-ի զրուցակիցն է Գերագույն խորհրդի պատգամավոր Վիգեն Խաչատրյանը։
-«Ելք» դաշինքը Հայաստանի՝ ԵԱՏՄ-ից դուրս գալու գործընթաց սկսելու հայտարարության նախագիծ է պատրաստել։ Ի՞նչ եք կարծում, ի՞նչ հեռանկարներ ունի այս առաջարկը։
–Չեմ կարծում, թե այդ նախաձեռնությունը հաջողությամբ կպսակվի, բայց քննարկումն օգտակար կլինի։ Մի գեղեցիկ օր, իհարկե, դա տեղի է ունենալու՝ կամ ԵԱՏՄ-ն է վերանալու առհասարակ, կամ էլ մենք ենք դուրս գալու, բայց որ տեղի է ունենալու՝ ես դրանում վստահ եմ։ Քննարկումը լավ է, ապագային միտված հարցադրում է, որը պետք է դեռ վաղուց բարձրացվեր։
-Իսկ ինչպե՞ս անել, որ սա չմնա զուտ որպես «Ելք»-ի նախաձեռնություն, այլ ընդգրկի ամբողջ հասարակական, քաղաքական դաշտը։
-Երբ իրավիճակը հասնում է նրան, որ հասարակությունն ամբողջովին օտարվում է իշխանությունից՝ ակտիվ քաղաքական դրսևորումներ դժվար է սպասել։ Հասարակության և իշխանության միջև անջրպետը շատ մեծ է, կտրված են իրարից։ Այն հարցերը, որոնք իշխանության դաշտում պետք է իրականություն դառնան ու լուծում ստանան, հասարակությանը չեն հետաքրքրում։ Իսկ դա, ըստ իս, շատ վտանգավոր է։
-Այդ օրակարգը կարո՞ղ է մարդկանց փողոց դուրս բերել։
-Չեմ կարծում։ Մարդկանց փողոց դուրս գալը այդպես միանգամից չի լինում։ Ինչ-որ բանից պետք է սարսափելի մեծ դժգոհություն լինի, իսկ այսօր ԵԱՏՄ-ից այդպիսի մեծ դժգոհություն չկա։ Կամ էլ պետք է հասարակությանը տանող ուժ լինի, որ մարդիկ հավատան, իսկ այսօր այդպիսի ուժ չկա։
-Մոսկվան ինչպե՞ս կարձագանքի այս տրամադրություններին՝ թեկուզ եթե դրանք ընդդիմության մակարդակով են հնչեցվում։
–Իհարկե իրենց նման նախաձեռնությունները դուր չեն գա, հերթական կոպիտ արձագանքը կլինի։ Որևէ երկրորդական աստիճանի մարդ Հայաստանի սուվերենությունը ոտնահարող, ոչ ականջահաճո բաներ կասի, բայց դա մեզ չպետք է հետաքրքրի։ Ես կարևոր եմ համարում այդ հարցի բարձրաձայնումը, թեկուզ և միայն քննարկումը՝ առանց դրական արդյունքների։
-2018 թվականի վարչապետի հարցը կարո՞ղ է մարդկանց ոգևորող և փողոց դուրս բերող օրակարգ լինել։
-Ինձ թվում է՝ ոչ։ Այդ թեման հասարակությանը շատ քիչ է հետաքրքրում։ Բոլորը հասկանում են, որ իշխանության՝ կոնկրետ խմբավորման մնալու խնդիրը լուծված է։ Իսկ թե նրանցից կոնկրետ որ մեկը կլինի՝ հասարակության կյանքում մեծ բան չի փոխվի։