Երեկ լրատվամիջոցներում հայտնվել էր մի տեղեկություն, համաձայն որի Microsoft ընկերությունը Skype-ը 8.5 միլիարդ դոլարով գնելուց հետո նպատակադրվել է գնել ֆիննական Nokia ընկերությունը, որն առաջատար է բջջային հեռախոսների շուկայում:
Սակայն երեկ Nokia-ի գլխավոր տնօրեն Սթիվեն Էլոփը հերքել է այս տեղեկությունները. «Դրանք ասեկոսեներ են, որոնք իրականության հետ կապ չունեն»,- ասել է Էլոփը: Նա ասել է, որ վերջերս ցուցանիշների անկում է արձանագրվել, սակայն ընկերությունում հույս ունեն, որ իրենց առաջ դրված խնդիրները կլուծվեն:
Հիշեցնենք, չնայած այն հանգամանքին, որ Nokia-ն շարունակում է առաջատար մնալ բջջային հեռախոսների շուկայում, սակայն նրա ցուցանիշները եռամսյակից եռամսյակ ավելի են վատանում՝ զիջելով Apple-ի և Google-ի սարքերին և օպերացիոն համակարգերին: Տեղեկացնենք նաև, որ 2011թ. սկզբին Nokia-ն հայտարարել էր Microsoft-ի հետ ռազմավարական համագործակցության մասին, իսկ վերջինիս Windows օպերացիոն համակարգը պետք է դառնա Nokia-ի հեռախոսների համար հիմնականը: