Ֆուտբոլի Հայաստանի բարձրագույն խմբի առաջնության առաջին շրջանը նշանավորվեց Գյումրիի «Շիրակի» փայլուն ելույթով: 5 խաղում տոնելով նույնքան հաղթանակ՝ Գյումրիի թիմը 15 միավորով գլխավորում է մրցաշարային աղյուսակը՝ 7 միավորով գերազանցելով երկրորդ տեղում գտնվող Հայաստանի գործող չեմպիոն «Ալաշկերտին»:
Մրցաշրջանի մեկնարկից առաջ շատերն այն կարծիքին էին, որ «Շիրակը» չի կարողանա լուրջ պայքար մղել չեմպիոնի կոչման համար: Ամռանը «Շիրակից» հեռացավ հայկական ֆուտբոլի թերևս ամենահեռանկարային ֆուտբոլիստը՝ Վահան Բիչախչյանը, համալրելով Սլովակիայի չեմպիոն «Ժիլինայի» շարքերը: «Շիրակից» հեռացան նաև մի քանի լեգեոներներ, և թվում էր, թե այս թիմի խաղը որոշակի անկում կապրի:
Հաղթելով առաջնության մասնակցող բոլոր թիմերին՝ «Շիրակն» ապացուցեց, որ այս պահին ուժեղագույնն է մեր երկրում: «Շիրակում» քիչ չեն լեգեոներները, բայց գլխավոր մարզիչ Վարդան Բիչախչյանին հաջողվել է ճիշտ համադրել նրանց և տեղացի ֆուտբոլիստներին: Կարելի է ասել, որ «Շիրակն» այս պահին ամենաբալանսավորված և գրագետ խաղն է ցուցադրում:
Ի դեպ, Գյումրիի թիմը որևէ ներկայացուցիչ չունի Հայաստանի ազգային և երիտասարդական հավաքականներում: Ազգային թիմի գլխավոր մարզիչ Արթուր Պետրոսյանը կարծում է, որ Գյումրիի թիմում չկան ֆուտբոլիստներ, որոնց խաղամակարդակը ներում է խաղալ հավաքականում: Իսկ թե ինչպես են խաղում, նրա կարծիքով, լավ մարզավիճակում գտնվող և պայքարին պատրաստ տղաները՝ բոլորս տեսանք: «Ցնցող» ելույթներ Մոնտենեգրոյի, Ռումինիայի և Դանիայի հետ հանդիպումներում: Ռումինիայի և Դանիայի հետ հանդիպումներին հրավիրվել էր «Շիրակի» դարպասապահ Անատոլի Այվազովը, բայց վերջինս կարիերայի հետ կապված այլ նպատակներ ունենալու պատճառով ժամանակավորապես մերժել էր Պետրոսյանի հրավերը:
Ինչևէ, բարձրագույն խմբի առաջնության առաջին շրջանում ոչ այնքան հաջող ելույթով աչքի ընկավ «Ալաշկերտը»: Այս թիմն ունենալով բավական ուժեղ կազմ՝ դեռևս ցույց չի տալիս այն ֆուտբոլը, որն ակնկալում են երկրպագուները: Ինչ խոսք, «Ալաշկերտի» անհաջող ելույթի մեղավորներից է դարպասապահ Արսեն Բեգլարյանը, ով մի քանի անգամ թիմին զրկեց միավորներից:
Առաջնության առաջին շրջանն անհաջող էր նաև փոխչեմպիոն «Գանձասար-Կապանի» համար, որին 5 խաղում հաջողվեց վաստակել ընդամենը երկու միավոր: Բացի «Շիրակից»՝ դրական կարելի է համարել «Արարատի» և «Բանանցի» ելույթները: Մասնավորապես, «Բանանցի» գլխավոր մարզիչ Արամ Ոսկանյանին ևս հաջողվել է համադրել տեղացի ֆուտբոլիստներին և լեգեոներներին: Բացի այդ, երևանյան թիմը ցուցադրում է կամային բարձր որակներ: Երեք անգամ լինելով հետապնդողի դերում՝ «Բանանցին» հաջողվել է շտկել իրավիճակը և մեկ միավոր վաստակել: Ընդ որում, «Փյունիկի» և «Ալաշկերտի» հետ մրցավեճերում «Բանանցը» ոչ-ոքի է խաղացել՝ պարտվելով 2:0 հաշվով: 5-րդ տուրում էլ Ոսկանյանի թիմը կամային հաղթանակ տարավ՝ 2:1 հաշվով առավելության հասնելով «Արարատի» նկատմամբ:
Ընթացիկ առաջնությունում կարելի է ասել, որ «Արարատը» ամենահայկական թիմն է: Վերջինի կազմում ընդգրկված են ընդամենը երկու բրազիլացի լեգեոներներ, որոնք հազվադեպ են հայտնվում հիմնական կազմում: «Արարատը» ցուցադրում է գրագետ ֆուտբոլ, և եթե վճռական պահերին այս թիմի ֆուտբոլիստներն ավելի դիպուկ գտնվեին, կարծում ենք՝ արդյունքը բոլորովին այլ կլիներ: Կարծում ենք նաև, որ առաջիկայում «Արարատի» խաղը կբարելավվի, և թիմը պայքար կմղի եվրագավաթների խաղարկություններում հանդես գալու համար: Նշենք, որ «Արարատը» ևս որևէ ներկայացուցիչ չունի Հայաստանի ազգային և երիտասարդական հավաքականներում:
Ինչ վերաբերում է «Փյունիկին» ապա այս թիմն ըստ էության վերակազմավորման փուլում է՝ ռուս մասնագետ Ալեքսեյ Երյոմեկոյի գլխավորությամբ: Թիմը համալրվել է մի քանի փորձառու ֆուտբոլիստներով՝ Լևոն Հայրապետյան, Կառլեն Մկրտչյան, և ժամանակ է հարկավոր, որ թիմի նոր գլխավոր մարզիչը ձևավորի խաղային կորիզը:
Հ.Գ. Հայաստանի բարձրագույն խմբի առաջնության հանդիպումները որևէ հեռուստաալիք չի հեռարձակում: Միայն «Բանանց» և «Շիրակ» թիմերն են նախաձեռնում հանդիպումների ինտերնետային հեռարձակում: Կարծում ենք՝ ճիշտ կլիներ, որպեսզի նշված թիմերի օրինակին հետևեին մյուս 4 ակումբները: Հանդիպումների ցուցադրումը թեկուզ չնչին չափով, այնուամենայնիվ, կմեծացնի հետաքրքրությունը առաջնության նկատմամբ:
