«Բազմաթիվ առիթներ եղել են, երբ «Ժառանգություն» կուսակցությունն իր կարծիքն է հայտնել Հայաստանի՝ ԵՏՄ-ում լինելու հետ կապված։ «Ելք»-ի առաջարկներին արձագանքելը կամ աջակցություն ցույց տալը մի փոքր այլ կերպ եմ պատկերացնում»,- «Առաջին լրատվական»-ի հետ զրույցում նման տեսակետ հայտնեց «Ժառանգություն» կուսակցության վարչության անդամ Սուսաննա Մուրադյանը՝ անդրադառնալով «Ելք» դաշինքի՝ ԵՏՄ-ից դուրս գալու վերաբերյալ գործընթաց սկսելու օրենքի նախագծին։
Սուսաննա Մուրադյանը շարունակելով իր միտքը, ընդգծեց՝ բազմաթիվ առիթներ են եղել, որ իրենք են նախաձեռնություն ցուցաբերել և կոչ են արել, որ այլ ուժեր միանան, բայց «Ելք»-ի կողմից արձագանք չի եղել. «Օրինակ՝ վերջերս մենք կուսակցությունների խոշորացման, միավորման առաջարկ արեցինք, բայց «Ելք»-ը որևէ կերպ չարձագանքեց, ուստի մեր գործողությունները մենք որևէ կերպ չենք կապում «Ելք»-ի նախաձեռնությունների և ցանկությունների հետ»,-ասաց Մուրադյանը՝ միևնույն ժամանակ ընդգծելով, որ ԵՏՄ-ից դուրս գալը և Եվրամիության հետ ավելի խոր համագործակցության գնալը մնում է«Ժառանգություն» կուսակցության օրակարգում և առաջնահերթություններում։
Մեր զրուցակցի խոսքերով՝ իրենք մնում են իրենց նախկինում հայնտած այն դիրքորոշմանը, որ ԵՏՄ-ին միանալը կոպտագույն սխալ էր. «Մենք այդ մասին մեկ անգամ չէ, որ բարձրաձայնել ենք, բայց կոնկրետ միանալ կամ աջակցելը չեմ պատկերացնում՝ ինչպես պետք է լինի։ Դուք գիտեք, որ «Ժառանգություն» կուսակցությունը ներկայացված չէ խորհրդարանում, ուստի մենք քվեարկության մասնակցել չենք կարող։ Բայց նախորդ գումարման խորհրդարանում մեր պատգամավորները բազմիցս բարձրացրել են այդ հարցը և ԵՏՄ-ին միանալու քվեարկության ժամանակ դեմ են քվեարկել»,- ասաց Սուսաննա Մուրադյանը։
«Ժառանգության» վարչության անդամը միևնույն ժամանակ կարծիք հայտնեց, որ եթե իրենք դրսում նման պահանջ բարձրացնեն՝ իր դիտարկմամբ նույն «Ելք»-ն իրենց չի միանա. «Իսկ եթե միանան՝ միայն կողջունենք»,- ասաց նա։
Մեր այն հարցին, թե արդյո՞ք հիմա ժամանակն է նման գործընթաց սկսելու համար, արդյո՞ք կիսում է այն մտահոգությունները, որ այժմ ԵՏՄ-ից դուրս գալով՝ Հայաստանն էլ ավելի վատ դրության մեջ չի հայտնվի, Սուսաննա Մուրադյանն արձագանքեց. «Իսկ Հայաստանն ավելի վատ դրության մեջ կարո՞ղ է լինել։ Անկեղծ ասած՝ ես սրանից ավելի վատ իրավիճակ չեմ պատկերացնում։ Հայաստանում ամեն օր տնտեսության անկում է գրանցվում, սրանից ավելի վատը ո՞րն է»,- եզրափակեց նա։