«Արմինիըն Ուիքլի» թերթը հրապարակել է Տիգրանակերտի Սուրբ Կիրակոս եկեղեցու ներկա վիճակը պարզող լուսանկարներ՝ նշելով, որ այս լուսանկարները գաղտնի արել են անցյալ հուլիսին՝ փոխանցում է «Ասպարեզ»-ը:
Երկար տարիներ ավերակ մնալուց հետո Սուրբ Կիրակոս եկեղեցին՝ թաղական խորհրդի, նախկին տիգրանակերտցիների և քաղաքապետարանի ջանքերով վերանորոգվել էր և 2011-ի հոկտեմբերին վերաբացվել՝ մեծ ոգևորություն պատճառելով համայն հայությանը և տեղի բնակիչներին: Եկեղեցու վերաբացումից հետո բազմաթիվ ծպտյալ հայեր սկսել էին հրապարակ իջնել և համախմբվել եկեղեցու կամարների ներքո: Հայ հոգևոր գրականության մեջ հաճախ շեշտվում է, որ «եկեղեցին ժողովո՛ւրդ է»: Սուրբ Կիրակոսի այդ նոր օծումը և վերաբացումը այդ հաստատման հրաշքի համազոր ապացույցը եղավ:
Ափսո՜ս, սակայն, որ վերջին տարիներին Թուրքիայի որդեգրած ռազմատենչ քաղաքականության պատճառով եկեղեցու տարածքը անհասանելի եղավ բոլորի համար:
Նախապես թուրքական մամուլի մեջ հայտնվել էին մի շարք լուսանկարներ, որոնցում երևում էին հատուկ ծառայության ոստիկաններ՝ եկեղեցու մեջ: «Արմինիըն Ուիքլի»-ի հրապարակած լուսանկարներով ևս հայտնի է դառնում, որ պատահած վնասը շատ մեծ չէ՝ նույն տարածքում գտնվող այլ սրբավայրերի համեմատ:
Ուրեմն կարելի է մխիթարվել նրանով, որ Սուրբ Կիրակոս եկեղեցին առայժմ նվազագույն վնասով է դուրս եկել այս բարբարոսությունից: Իսկ եկեղեցու հոտը հոյսով սպասում է ներկա պայմանների բարելավման և եկեղեցու՝ վերստին պաշտամունքի համար բացվելուն:
