Հոկտեմբերի 5-6-ը Երևանում արդեն երկրորդ անգամ տեղի ունեցավ միջազգային համաժողով` «Վիքիկոնֆերանս Երևան 2013»-ը: Համաժողովն ուղղված էր Հայաստանում Վիքի-մշակույթի տարածմանը, հայերեն «Վիքիպեդիայում» կրթական ու մշակութային նյութերի որակի բարձրացմանը և ավելացմանը:
«Առաջին լրատվական»-ի հետ զրույցում «Վիքիմեդիա Հայաստան» ՀԿ-ի նախագահ Սուսաննա Մկրտչյանը տեղի ունեցած համաժողովը որակեց որպես «խորը ուսումնասիրությունների քննարկման հարթակ» և նշեց, որ այս տարվա համաժողովը որակապես տարբերվում էր անցյալ տարվանից. «Այս տարի մասնակիցներն ավելի տեղեկացված մարդիկ էին, հյուրերը շատ հետաքրքիր ելույթներ ունեցան, ներկաներից գրեթե բոլորը խմբագրողներ էին: Անգամ արդեն ծրագրեր ունենք կոնկրետ մասնագետների հետ` սեմինարների և քննարկումների կազմակերպման համար»:
Նա նշեց, որ նոր ծրագրերի շնորհիվ ուզում են հասնել նրան, որ երիտասարդները և այն մարդիկ, ովքեր կարող են իրենց գիտելիքներով օգնել, ավելի ակտիվ լինեն, մասնակցեն խմբագրման աշխատանքներին:
Արդեն պայմանավորվածություն է ձեռք բերվել Գերմանիայի և Ֆրանսիայի ներկայացուցիչների հետ` միմյանց մասին ինֆորմացիայով փոխանակվելու վերաբերյալ: Գերմանացիներն ու ֆրանսիացիները գրելու են մեր մասին, մենք` իրենց: Այս կերպ հնարավորություն է ընձեռվում Հայաստանը ներկայացնել օտարալեզու «Վիքիպեդիաներում»:
Այս տարի անցկացված համաժողովին ներկա էին շուրջ 6 երկրների ներկայացուցիչներ` ԱՄՆ-ից, Գերմանիայից, Ֆրանսիայից, Չեխիայից, Ուկրաինայից և Սլովակիայից: Նրանցից շատերը Հայաստան էին եկել իրենց նախաձեռնությամբ` տեղական ներկայացուցչությունների հաշվին. «Անցյալ տարի մեր հյուրերը միայն «Վիքիմեդիա» հիմնադրամի ղեկավար անձերն էին: Նրանք էին տեսնել մեր գործունեությունը և աջակցել, որ կոնֆերանսը կայանա, իսկ այս տարի շատ հյուրեր իրենց հաշվին էին եկել, այսինքն իրենք տեսնում են առաջընթաց և հետաքրքրություն` Հայաստանի տարածաշրջանային կենտրոնի նկատմամբ»:
Նա նշեց նաև, որ շատ երկրներ կազմակերպություն հիմնելու համար շուրջ երեք տարի սպասում են, իսկ Հայաստանում անցյալ տարվա կոնֆերանսից հետո արդեն հիմնվել է այդ կազմակերպությունը: Սուսաննա Մկրտչյանն առանձնացրեց նաև Սփյուռքի դերը հայերեն «Վիքիպեդիայի» զարգացման հարցում: Նա ասաց, որ այս տարի Երևանում էին երկու սփյուռքահայ, սակայն Սփյուռքի հետ կապված այլ ծրագրեր ունեն. «Մենք Սփյուռքի միջոցով ուզում ենք Հայաստանը կապել տարբեր երկրների հետ, Սփյուռքը կապել տեղի Վիքի-համայնքի հետ»:
Ըստ նրա` այդ գործընթացը շարունակական է, և հետևողական աշխատանքի ու համագործակցությունների արդյունքում հայերեն «Վիքիպեդիան» արագ տեմպերով զարգանում է:
