The Guardian բրիտանական պարբերականը հետաքննություն է անցկացրել, որի արդյունքում պարզել է, որ Ադրբեջանի իշխող էլիտան 2.9 մլրդ դոլարի գաղտնի սխեմա է իրականացրել՝ ականավոր եվրոպացիներին վճարելու, շքեղ ապրանքներ ձեռք բերելու և գումար լվանալու համար, որը կատարվել է ոչ թափանցիկ բրիտանական ընկերությունների միջոցով:
«Արտահոսած տվյալները վկայում են, որ մարդու իրավունքների մի շարք խախտումների, համակարգային կոռուպցիայի և ընտրությունների կեղծման մեջ մեղադրվող ադրբեջանական ղեկավարությունն ավելի քան 16 հազար գաղտնի վճարում է կատարել 2012-2014 թվականներին», – ասվում է հրապարակման մեջ։
Սյդ գումարի մի մասն ուղղվել է քաղաքական գործիչներին և լրագրողներին՝ որպես միջազգային լոբբինգի մաս՝ վերջ դնելու Ադրբեջանի նախագահ Իլհամ Ալիևին ուղղված քննադատությանը և խթանելու նրա՝ նավթով հարուստ երկրի դրական պատկերը։
Նշվում է, որ 7 մլն ֆունտ էլ ծախսվել է Բրիտանիայում շքեղ ապրանքների և մասնավոր դպրոցների վարձավճարների համար:
Ֆինանսները, որոնք ներդրվել են ադրբեջանական և ռուսական ոչ թափանցիկ վճարային համակարգերի միջոցով, ուղղվել են բրիտանական ընկերություններ: Եվրոպայի առաջատար բանկերից Danske-ն վճարումներ է իրականացրել իր էստոնական մասնաճյուղի միջոցով: Անկանոն վճարումները բանկում նկատվել են 2014 թվականին։ Փողերի լվացումը կանխող համակարգը խափանված է եղել:
Նշենք, որ գաղտնի սխեման ստացել է «Ադրբեջանական լվացքատուն» անունը: