Ֆուտբոլի Հայաստանի ազգային հավաքականն այսօր կխաղա Ռումինիայի հետ: Բուքմեյքերական ընկերությունները այս դիմակայությունում բացահայտ ֆավորիտ են համարում ռումինացիներին: Դաշտի տերերի հաղթանակը գնահատված է 1.4 գործակցով:
Ինչ խոսք, Ռումինիան ավելի ուժեղ է, խաղում է սեփական հարկի տակ, բայց դժվար թե գտնվի Հայաստանի հավաքականի գեթ մեկ երկրպագու, ով սրտի խորքում չհավատա մեր հաղթանակին: Թե Սերժ Սարգսյանը և թե մեր թաղի Վարդանիկը անհամբեր սպասում են մերոնց այսօրվա հաղթանակին: Նույնիսկ ամենաուժեղ մրցակիցների դեմ խաղերում հավատում ենք հրաշքի:
Հայաստանի հավաքականում կան լուրջ խնդիրներ: Խնդիրներ, որոնք լուծում կստանան միայն համակարգային փոփոխությունից հետո: Բայց հիմա խնդիրների մասին խոսելու ժամանակը չէ: Խնդիրները բազմիցս ենք շոշափել, առաջարկել լուծումներ, իրավիճակը շտկելու տարբերակներ: Քննադատությունը, ինչ խոսք, շատերին հաճելի չէ: Բազմաթիվ պատճառներ կարելի է փնտրել պարտությունների և ձախողումների մեջ: Ձախողումներից ոչ ոք ապահովագրված չէ, պարզապես աշխատել է պետք պարտություններից խուսափելու համար:
Ու այսօր մեր հավաքականն ունի հիանալի հնարավորություն՝ ապացուցելու, որ մեր ֆուտբոլային թիվ մեկ ներկայացուցիչն ամենևին ձախողակ չէ: Հաղթեք Ռումինիային և ապացուցեք, որ շատ քննադատություններ ամենևին տեղին չէին, և Մոնտենեգրոյի դեմ անփառունակ ելույթը չի արտացոլում մեր ֆուտբոլի դեմքը:
«Իմ կարծիքով՝ Երևանում 5:0 հաշվով պարտվելուց հետո մենք ապացուցելու բան ունենք: Ինչ-որ բաներ փոխել ենք նախորդ խաղի համեմատ: Կփորձենք իրականացնել մեր մտահղացումները»,- երեկ լրագրողների հետ հանդիպմանը ասել է Արթուր Պետրոսյանը:
Այս մասնագետը անկախ Հայաստանի պատմության լավագույն ֆուտբոլիստներից է, մեծ ավանդ ունի ազգային հավաքականում: Չենք կասկածում, որ Պետրոսյանն անմնացորդ նվիրումով աշխատում է հավաքականում որպես մարզիչ: Այս մասնագետի նորամուտը ազգային թիմում պատմական կարելի է որակել: 2:0 պարտվելով՝ մեր հավաքականը գերկամային, նախադեպը չունեցող հաղթանակ տարավ Մոնտենեգրոյի նկատմամբ: Բալկանյան հավաքականից Պոդգորիցայում 4:1 հաշվով կրած պարտությունից հետո ոմանք կարծիք հայտնեցին, որ երևանյան հաղթանակը պատահականություն էր: Վստահաբար կարող ենք ասել, որ հաղթանակը ամենևին էլ պատահականության արդյունք չէր: Պետք է հասկանանք, որ ֆուտբոլում պատահականություններ չեն լինում:
«Իհարկե, պատահականություն չէր։ Երկրորդ խաղակեսում մենք արժանի խաղ ցուցադրեցինք։ Դա ցանկություն էր, աշխատանք էր, և այստեղ պատահականություն չեմ տեսնում։ Ես միշտ ասել եմ, որ մենք ճանապարհի սկզբին ենք և պետք է շատ-շատ աշխատենք, որպեսզի կարողանանք պինդ, բարձրակարգ թիմ դառնալ։ Ես իրատես և լավատես եմ, և այս խաղից հետո ոչինչ չի փոխվելու։ Ես երբեք չեմ ասել, որ մենք մասնակցելու ենք աշխարհի առաջնությանը, քանի որ լավ գիտեմ, թե մենք ով ենք, որտեղից ենք եկել և ինչ է մեզ սպասում։ Այս պարտությունը չի շեղի մեզ մեր ճանապարհից։ Իսկ այդ ճանապարհին լինելու են և՛ հաղթանակներ, և՛ պարտություններ, և եթե պարտությունից հետո կորցնենք մեր լավատեսությունը, ոչ մի բանի չենք հասնի»,- Մոնտենեգրոյից կրած պարտությունից հետո ասել էր Արթուր Պետրոսյանը:
Թե որտեղից է գալիս Հայաստանի ազգային հավաքականը, կարծում ենք, բոլորի համար է պարզ: Իսկ թե ուր ենք գնում և ինչ ճանապարհով՝ պարզ կդառնա շուտով: Ռումինիայի հետ հանդիպումը կտա որոշ հարցերի պատասխան: Ռումինիայում շատերը ցանկանում են, որ իրենց երկրի հավաքականը այսօր խոշոր հաշվով պարտվի, որպեսզի ազգային հավաքականի գերմանացի մարզիչը պաշտոնանկ արվի: Ռումինացի երկրպագուները ուզում են, որ ազգային թիմը գլխավորի լեգենդար ֆուտբոլիստ Գեորգի Հաջին:
Ի տարբերություն ռումինացիների՝ մենք ցանկացած պարագայում ակնկալում ենք հաղթանակ: Հնարավոր է՝ Ռումինիան ունի Հաջիի կարիքը, և ամենևին դեմ չենք լինի, եթե այսօվա մեր հաղթանակից հետո Հաջին գլխավորի ավանդույթներով հարուստ այս երկրի ազգային թիմը: Եթե ռումինացիները ունեն Հաջիի կարիքը, ապա մենք օդի և ջրի պես հաղթանակի կարիք ենք զգում: Հաղթանակ, որը իրավիճակ կփոխի, հույսեր կարթնացնի և վերջապես հպարտանալու առիթ կհանդիսանա:
