Իսրայելի ՊՆ-ն արգելել է Aeronautics Defense Systems ընկերությանը 20 միլիոն դոլարի անօդաչու թռչող սարքեր մատակարարել գնորդներից մեկին: Այս մասին հայտնում է իսրայելական NEWSru.co.il առցանց պարբերականը՝ հղում անելով բորսային կոմյունիկեին։
Չի հստակեցվում, թե խոսքը որ երկրի մասին է, սակայն նշվում է,որ այդ երկիրը Moody`s-ում ունի «Ba» վարկանիշ և նրա տարածքում գտնվում է այդ ընկերության պահեստամասեր արտադրող գործարանը:
Վերոնշյալ ընկերությունն ունի երկու հաճախորդ՝ Սերբիան և Ադրբեջանը, որից միայն Ադրբեջանում ունի արտադրական գործարան: Ստացվում է՝ արգելքի տակ հայտնված գնորդն Ադրբեջանն է:
Իսրայելի ՊՆ-ից դեռևս չեն պատասխանել NEWSru.co.il-ի հարցմանը։
«Իսրայելի պաշտպանության նախարարությունը բեկանեց դեպի Ադրբեջան անօդաչու թռչող սարքերի մատակարարումը: Դա տեղի ունեցավ այն բանից հետո, երբ ադրբեջանական կողմը պահանջեց արտադրող ընկերության ներկայացուցիչներից հայկական դիրքերի վրա փորձարկել նախկինում գնված ԱԹՍ, իսկ իսրայելցի մասնագետները հրաժարվեցին»,-գրում է Տիգրան Խզմալյանն իր ֆեյսբուքյան էջում: