Սեպտեմբերի 1-ից կառավարության նոր որոշման համաձայն՝ հացը և միսը պետք է տեղափոխվեն միայն սանիտարական անձնագրեր ունեցող փոխադրամիջոցներով: Այս նոր նորմի ներդրումը հարուցել է հատկապես մարզային տնտեսվարողների դժգոհությունը, ովքեր հացի արտադրամաս ունեն կամ մսի «գործ են անում»:
«Առաջին լրատվական»-ը մարզային մի շարք տնտեսվարողներից արդեն իսկ դժգոհություններ է ստանում, որ տեխնիկապես հնարավոր չէ գալ հասնել Երևան, արտադրամասի բոլոր մեքենաները բերել այստեղ, որպեսզի դրանք զննվեն և տրամադրվի համապատասխան կտրոնը գործունեությունը հետագայում շարունակելու համար: Մեզ զանգահարած տնտեսվարողը, որը կոնկրետ հացի արտադրամաս ուներ, ասաց, որ չի կարող իր արտադրամասի աշխատանքը դադարեցնել երկու օրով, իր 5 մեքենաները բերել Կապանից հասցնել Երևան, հերթերի մեջ կանգնել, որ ստանա այդ կտրոնը: Եվ սա այն դեպքում, որ Սննդի անվտանգության պետական տեսչությունն ունի նաև մարզային կառույցներ և կարելի է այդ կտրոնը ստանալ հենց տեղում:
Քանի որ նորմը նոր է, մենք փորձեցինք պարզել, թե ինչպես են տրամադրվում այդ կտրոնները և ինչ ընթացակարգ է սահմանված:
Նշեք, որ հունիսի 11-ից ուժի մեջ է մտել Գյուղատնտեսության նախարարության սննդամթերքի անվտանգության պետական ծառայության կողմից ընդունված՝ սննդամթերք տեղափոխող փոխադրամիջոցների սանիտարական անձնագրի օրինակելի ձևը և տրամադրման կարգը: Ըստ այդմ՝ սանիտարական անձնագիրը հավաստում է սննդամթերք տեղափոխող փոխադրամիջոցի համապատասխանությունը հիգիենիկ, սանիտարահամաճարակային, ինչպես նաև տեխնիկական կանոնակարգերի պահանջներին:
Սննդի անվտանգության տեսչությունից «Առաջին լրատվական»-ին տեղեկացրեցին, որ սանիտարական անձնագրերը տրամադրվում են փուլային եղանակով՝ մինչև 2020 թվականը: Դրանք տրվում են մեկ տարի ժամկետով և անվճար: Ընդ որում՝ սանիտարական անձնագրերն առաջինը կսկսեն տրամադրել Երևանում, ապա նոր գործընթացը, ըստ սահմանված ժամանակացույցի, կհասնի նաև մարզեր:
Ինչ վերաբերում է մարզերում սանիտարական անձնագրերի տրամադրմանը, ապա տեսչությունից մեզ փոխանցեցին, որ այդ անձնագրերը տրամադրվում են մարզային կառույցներում, բացի այդ, նաև խորհրդատվություն է տրամադրվում դրա հետ կապված, սակայն մինչ սանիտարական անձնագրերի տրամադրումը կա ևս մեկ միջանկյալ օղակ՝ անկախ մասնագիտական կազմակերպություն, որը մեքենաները ուսումնասիրելուց հետո եզրակացություն է տրամադրում, որի հիման վրա նոր տրամադրվում են սանիտարական անձնագրերը: Այս կազմակերպությունը, որը գնահատում է իրականացնում, չի գործում Սննդի անվտանգության պետական ծառայության ենթակայությամբ: «Ես ենթադրում եմ, որ տնտեսվարողները շփոթում են սանիտարական անձնագրերի տրամադրումը մասնագիտական կազմակերպության եզրակացության հետ: Ես պնդում եմ, որ մեր մարզային կառույցները տեղում տրամադրեն սանիտարական անձնագրերը, սակայն մինչ այդ պետք է լինի այդ կազմակերպության եզրակացությունը: Ես նաև ենթադրում եմ, որ, ըստ պահանջարկի, մասնագիտական կազմակերպությունը կընդլայնվի դեպի մարզեր, քանի որ ներկայումս փոփոխված նորմը մարզերին չի վերաբերում, խնդիր չի առաջանա»,-«Առաջին լրատվական»-ի հետ զրույցում ասաց ՍԱՊԾ-ի մամուլի խոսնակ Նվարդ Առաքելյանը:
Նշենք, որ մեզ այդպես էլ չհաջողվեց կապի որևէ տարբերակ գտնել այն մասնագիտական կազմակերպության հետ, որն ուսումնասիրում և մասնագիտական եզրակացություն է տրամադրում հաց և միս տեղափոխող մեքենաներին: