Նիգերիայում տարեսկզբից ավելի քան 80 երեխաներ օգտագործվել են որպես մահապարտներ՝ հարձակումներ իրականացնելու համար։ Այս մասին հայտել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը՝ փոխանցում է TASS գործակալությունը։
Նա ներկայացրել է ՅՈւՆԻՍԵՖ-ի տվյալները, համաձայն որոնց՝ ահաբեկչություններ իրականացրած երեխաների թիվն արդեն 4-րդ անգամ գերազանցում է նախորդ տարվա ցուցանիշը։
«2017 թվականի սկզբից 83 երեխա օգտագործվել է պայթյունների իրականացման համար, ներառյալ 55 աղջիկ, որոնց մեծ մասի 15 տարեկանը չի լրացել»,-ասել է Դյուժարիկը։
Նա նշել է, որ արմատական «Բոկո հարամ» խմբավորումը հաճախ, սակայն ոչ միշտ է ստանձնում այդ ահաբեկչությունների պատասխանատվությունը։
«Բոկո հարամի» գրոհայինների և նիգերիական բանակի դիմակայությունը շարունակվում է մոտ 8 տարի։ Այդ ընթացքում իր տունն է լքել առնվազն 2 մլն մարդ, մոտ 7 մլն-ը մարդասիրական օգնության կարիք ունի։
