Օգոստոսի 20-ին Սուխումում դաժան ծեծի է ենթարկվել Աբխազիայի պետավտոտեսչության աշխատակից Ալբերտ Զեբելյանը: «Նաշա Աբխազիա» պարբերականը գրում է, որ պատճառը եղել է նրա կողմից ձևակերպված տուգանքը։ Տուգանքը սահմանվել է առանց տեխանձնագրի մեքենա վարելու համար։ Զեբելյանը կանգնեցրել էր մեքենան, որի ղեկին գտնվել է 1992 թվականին ծնված Այնար Ավիձբան, և տուգանել նրան մեքենայի տեխանձնագրի բացակայության համար։ Հաջորդ օրը Զեբելյանին Նոր Աֆոնի իր տան մոտ դիմավորել է տուգանված վարորդն իր ծանոթի հետ։ Նրանք ծեծի են ենթարկել պետավտոտեսչության աշխատակցին և փախուստի դիմել։
Աբխազիայի Գագրայի հայ համայնքի նախագահ Խաչիկ Մինասյանն «Առաջին լրատվական»-ի հետ զրույցում մանրամասներ հայտնեց տեղի ունեցածից, ըստ որի՝ ազգությամբ աբխազ Այնար Ավիձբան չի ունեցել տեխանձնագիր, Ալբերտ Զեբելյանը նրան տուգանել է: Տուգանքը կազմել է 600 ռուբլի, որը նա պետք է վճարեր հաջորդ օրը: Հաջորդ օրը, սակայն, Զեբելյանին է զանգում Ավիձբա ազգանունով վարորդը և ասում, որ իրենք ծանոթներ են, որ Զեբելյանի կինը նրա համադասարանցին է և այլն, ասում է, որ ուզում է հանդիպել: Պայմանավորվել են և հանդիպել հաջորդ օրը, Ալբերտը ձեռքը մեկնել է բարևելու, հենց այդ պահին էլ նրան հարվածել են:
Խաչիկ Մինասյանը նշեց, որ կռվին միջամտել են երկու հայ տղաներ և փորձել պաշտպանել Ալբերտին. «Երեք աբխազները տեսնում են, որ Զեբելյանին պաշտպանելու համար միջամտել են ևս երկուսը, դուրս են բերում ատրճանակները: Ալբերտին խփել են ատրճանակով և խփել են անխնա՝ ականջին, դեմքին, մարմնին: Սուխումի հիվանդանոցում վիրահատել են, հիմա նորմալ է զգում իրեն, բայց վիճակը դեռ ծանր է»,- ասաց Խաչիկ Մինասյանը՝ հավելելով, որ կռվից հետո աբխազներից երկուսը դիմել են փախուստի: Նա տեղեկացրեց, որ խոսել է բարձրաստիճան պաշտոնյաների հետ, խոսել է նախագահի օգնականի հետ, հաղորդել են, որ մտահոգված են, հետևողական են և զբաղվում են գործի քննությամբ:
Խաչիկ Մինասյանը տեղի ունեցածի մեջ չի տեսնում հակահայկական մոտեցում:
Ըստ պաշտոնական տվյալների՝ Աբխազիայում այսօր 42.000 հայ է ապրում, կա 25 հայկական դպրոց, Աբխազիայի պառլամենտում երեք պատգամավոր ունենք: Հիմա նկատվում է դեպի Ռուսաստան արտագաղթ: Խաչիկ Մինասյանը նշեց, որ հայ երիտասարդներից շատերը այսօր մեկնում են Ռուսաստան և չեն վերադառնում:
