Եթե Իրաքի կենտրոնական կառավարությունն ու Էրբիլը (Իրաքյան Քրդստանի մայրաքաղաք) ցանկանան Թուրքիայի միջնորդությունը՝ կողմերի միջև տարաձայնությունների կարգավորման համար, Անկարան պատրաստ է նման օգնություն ցուցաբերել։ Այս մասին հայտարարել է Թուրքիայի արտգործնախարար Մևլյութ Չավուշօղլուն՝ Իրաք այցի ժամանակ։
Արտգործնախարարը նշել է, որ քրդական ինքնավարության անկախության վերաբերյալ հանրաքվեի անցկացման հարցը պետք է լուծվի Իրաքի տարածքային ամբողջականության շրջանակում։ «Թուրքիան բազմիցս հիշեցրել է Էրբիլին անկախության հանրաքվեի անցկացման վտանգավորության մասին»,-ասել է Չավուշօղլուն։
Արտգործնախարարը նշել է, որ Թուրքիան աջակցում է Իրաքի ինքնիշխանությանն ու պահանջում Էրբիլից անկախության հանրաքվեի անցկացման որոշման չեղարկում։
«Անկարան, ինչպես նախկինում, կաջակցի Բաղդադին ԴԱԻՇ-ի, ինչպես նաև PKK-ի գրոհայինների դեմ պայքարում, որոնք սպառնալիք են ներկայացնում Իրաքի ամբողջականությանն ու անվտանգությանը։ Թուրքիան պատրաստ է նաև մասնակցել ԴԱԻՇ-ից ազատագրված Իրաքի քաղաքների վերականգնման նախագծերին»,-ասել է Չավուշօղլուն։
Չավուշօղլուն նշել է, որ Իրաքում լիարժեք կայունության ու խաղաղության համար այդ պետության տարածքները պետք է լիովին մաքրվեն ԴԱԻՇ-ի ու PKK-ի ահաբեկիչներից։
Բարզանին հայտարարել է, որ հանրաքվեի անցկացման նախապատրաստությունն ավարտվել է։
«Քրդական ինքնավարությունում մտադիր չեն ամեն անգամ հետաձգել անկախության հանրաքվեի անցկացումը»,-ասել է Բարզանին։
