ՀՀ Բնապահպանության նախարար Արծվիկ Մինասյանը ներկայացրել է նախարարության առաջիկա քայլերը Հայաստանում վերջին անտառային հրդեհներից հետո` հետագայում նման դեպքերին ավելի արդյունավետ արձագանքելու համար: «Ազատություն» ռադիոկայանի ֆեյսբգուքյան ասուլիսի ընթացքում ՀՀ բնապահպանության նախարարը չբացառեց, որ նախարարությունն առաջիկայում արագ արձագանքման ջոկատների և տեխնիկական զինվածության խնդիր լուծի: «Սա անհրաժեշտ է նրա համար, որպեսզի հատկապես անտառային հրդեհների ժամանակ, որոնք էականորեն տարբերվում են հրդեհի մյուս դեպքերից, մեր արագ արձագանքումը լինի առավել արդյունավետ»,- ընդգծել է նախարարը:
Նա հավելեց, որ իրականում անելիքներ կան կապի ապահովման հարցում: «Մենք արդեն օպերատորների հետ աշխատանքներ ենք տանում, չվնասելով բնությանը, լիարժեք կապ ապահովելու ուղղությամբ, որպեսզի հետագայում դա դառնա նաև անհրաժեշտ դիտարկումների, մոնիտորինգի համար լավագույն գործիք»,- ասաց Մինասյանը:
Նախարարը նշեց,որ առաջիկայում ավելի ամբողջական պատկեր կունենան վերջին անտառային հրդեհների հետևանքով պատճառված վնասների և հնարավոր գործողությունների մասին:
