ԱՄՆ պաշտպանության նախարար Ջեյմս Մետիսը հայտարարել է, որ ԴԱԻՇ ահաբեկչական խմբավորման օրերը հաշված են, սակայն դեռևս վաղ է խոսել դրա ջախջախման մասին։ Այս մասին հայտնում է AP գործակալությունը։
«Ինչպես տեսնում եք, ԴԱԻՇ-ը սեղմվել է հակառակորդի ուժերի միջև։ Այնպես որ ԴԱԻՇ-ի օրերը հաշված են»,-ասել է Մետիսը Բաղդադ կատարած չհայտարարված այցի ընթացքում։
Մետիսի խոսքով՝ ներկա պահին գրոհայինները գտնվում են իրենց «վերջին սահմանին»։ Նա կարծում է, որ բարձրագույն զինվորական ղեկավարությունը պետք է լուռ իր գործն անի՝ խուսափելով մարտի հնարավոր ելքի վերաբերյալ կանխատեսումներից։
«Իմաստ չկա կանխատեսելու այն, ինչն ըստ էության անկանխատեսելի է»,-հայտարարել է նա։
Ավելի վաղ հաղորդվել էր, որ Մետիսը ժամանել է Իրաք՝ հանդիպելու երկրի առաջնորդների հետ և քննարկելու ԴԱԻՇ-ի դեմ պայքարի հետագա քայլերը։