Ճանապարհորդների շրջանում ամենից քիչ ժողովրդականություն վայելող երկիրը խաղաղօվկիանոսյան Տուվալուն է (Պոլինեզիա)։ Այս մասին հայտնում է Daily Mail-ը։
Պարբերականը մեջբերում է Համաշխարհային զբոսաշրջային կազմակերպության տվյալները, համաձայն որոնց՝ 2016 թվականին Տուվալուն ընդունել է 1000 օտարերկացր հյուրի։ Այդ ուղղության առավելությունների թվում անվանվում է հանցավորության ու ահաբեկչական սպառնալիքի ցածր մակարդակը։
Վարկանիշի երկրորդ տեղը զբաղեցնում է նույնպես Խաղաղ օվկիանոսում գտնվող Կիրիբատիի հանրապետությունը (Միկրոնեզիա և Պոլինեզիա)։ 2016 թվականին այնտեղ եղել է մոտ 4000 զբոսաշրջիկ։
Եռյակը եզրափակում է Սան-Տոմե և Պրինսիպին՝ կղզի պետություն Կենտրոնական Աֆրիկայում։ Այն ընդունել է 8000 հյուրի։ Չորրորդ հորիզոնականում է բրիտանական անդրծովյա տարածք Մոնտսերատը (9000 հանգստացող)։ Հնգյակը եզրափակում է աֆրիկյան Կոմորա պետությունը, որտեղ անցած տարի այցելել է 24 հազար զբոսաշրջիկ։
Վարկանիշի տասնյակում են ընդգրկվել նաև Ջիբութին (Աֆրիկա), Սան-Մարինոն (Եվրոպա), Արևելյան Թիմորը (Ասիա), Լիխտենշտեյնը (Եվրոպա) և Սիերա Լեոնեն (Աֆրիկա)։