Հրաչյա Հարությունյանի ընտանիքի անդամներն ու հարազատները չեն հուսահատվել և դեռ սպասում են, որ Սերժ Սարգսյանը ներում կշնորհի Հարությունյանին, և նա կկարողանա իր ընտանիքի հետ լինել և զբաղվել իր բուժման հարցերով: Այս մասին «Առաջին լրատվական»-ի հետ զրույցում ասաց Հարությունյանի աները՝ Վիկտոր Մարտիրոսյանը՝ հավելելով, որ դատական նիստից հետո էլ նախագահի ներման հանձնաժողովից չեն պատասխանել իր դիմումին:
«Դեռ սպասում եմ: Օրերս երբ գնացի, ինձ ասացին, որ դատական նիստը պետք է կայանա, իրենց ուղարկեն համապատասխան թղթերը, և նոր հնարավոր կլինի դիմումին պատասխանել: Ես էլ դեռ սպասում եմ»,- ասաց Մարտիրոսյանը:
Վերջինիս խոսքով՝ ոչ պաշտոնապես, խոսակցությունների մակարդակով լսել է, որ դեկտեմբերին հնարավոր է Հրաչյա Հարությունյանը ներմամբ ազատ արձակվի: «Սա պաշտոնական չի, բայց նրանով, նրա գործով հետաքրքրված անձը, պատգամավորները հույս են տալիս, ասում են, որ հնարավոր է՝ դեկտեմբերին ազատ արձակվի»,- նկատեց մեր զրուցակիցը:
Մեր դիտարկմանը, թե սպասո՞ւմ էին, որ հայաստանյան դատարանը անփոփոխ կթողնի Հարությունյանի վճիռը, քանի որ ավելի վաղ խոսակցություններ կային, որ նույն արարքի համար Հայաստանում նվազագույն պատիժը 4 տարի է, և հենց այդքան իր պատիժն արդեն կրել է Հարությունյանը, Մարտիրոսյանը պատասխանեց. «Չգիտեմ: Դեռ սպասում ենք: Ասել են՝ մի 20 օրից նոր պարզ կլինի, թե ինչ պատժաչափ է լինելու»:
Հիշեցնենք, որ Հրաչյա Հարությունյանը, ով ազատազրկման էր դատապարտվել 6 տարի 9 ամիս ժամկետով, 2013 թվականի հուլիսի 13-ին ՌԴ Պոդոլսկի շրջանի մերձակայքում «Կամազ» մակնիշի բեռնատար մեքենայով բախվել էր մարդատար ավտոբուսին, ինչի հետևանքով զոհվել էր 18 մարդ: Հրաչյա Հարությունյանին մեղադրանք էր առաջադրվել ՌԴ քրեական օրենսգրքի 264 (երթևեկության կանոնների խախտում և տրանսպորտային միջոցների շահագործում) և 327 (փաստաթղթերի կեղծում, պատրաստում կամ իրացում) հոդվածներով:
Նրան վերջերս տեղափոխեցին Հայաստան, և օրերս Էրեբունի և Նուբարաշեն վարչական շրջանների ընդհանուր իրավասության դատարանը ճանաչեց ՌԴ վճիռը և այն համապատասխանեցրեց ՀՀ օրենսդրությանը:
Հրաչյա Հարությունյանը ՌԴ-ում պատիժը կրել է 4 տարի ժամկետով:
Լուսանկարը՝ Photolure-ի