«Իմ կարծիքով՝ 2014թ.-ին հանրային տրանսպորտի ոլորտում բարեփոխումներ անելը շատ ավելի հեշտ գործընթաց էր, քան այժմ, որովհետև այսօր կան նաև տաքսի ծառայություններ, որոնք ծառայություն են մատուցում այնպիսի գներով, որոնք դարձել են իրական լուրջ այլընտրանք երթուղային տրանսպորտի համար: Բայց պետք չէ երթուղային ցանցը փրկելու համար վատ վիճակի մեջ դնել նաև տաքսու վարորդին, որովհետև նա ևս իր սոցիալական խնդիրն է լուծում»,- «Առաջին լրատվական»-ի հետ զրույցում ընդգծեց «Իրազեկ և պաշտպանված սպառող» ՀԿ նախագահ Բաբկեն Պիպոյանը՝ անդրադառնալով Երևանի հանրային տրանսպորտի ոլորտում փոփոխություններ կատարելու վերաբերյալ քաղաքապետարանում ընթացող քննարկումներին:
Մյուս կողմից էլ, սակայն, Բաբկեն Պիպոյանի պնդմամբ՝ հանրային տրանսպորտը գործարկելու համար չպետք է արհեստականորեն թանկացվի տաքսի ծառայությունների վճարը, քանի որ սա իր հերթին այլ խնդիրներ է առաջացնելու թե՛ տաքսու վարորդների, թե՛ սպառողների համար:
«Մենք հիմա այն վիճակում ենք, որ արդեն բավականին բարդացրել ենք տրանսպորտային համակարգը բուժելու պրոցեսը, և եթե մի փոքր էլ ուշացնենք, ապա հնարավոր է, որ այլևս ընդհանրապես չկարողանանք բուժել, այդ իսկ պատճառով անհրաժեշտ է լուրջ մոբիլիզացիա»,- ասաց նա:
Անդրադառնալով Երևանի փոխքաղաքապետ Վահե Նիկոյանի այն հայտարարությանը, թե շահագործումից այլևս հանվելու են միկրոավտոբուսներն ու չի լինելու գծատեր հասկացությունը, Պիպոյանը նշեց, որ իրականում հնարավոր չէ լինի այնպես, որ ամբողջ մայրաքաղաքում միանգամայն վերանան միկրոավտոբուսները, քանի որ քաղաքի ծայրամասային թաղամասերում, այդուհանդերձ, շարունակելու են շահագործվել միկրոավտոբուսները: Հարցին՝ արդյո՞ք գազելների շահագործումը դադարեցնելը սոցիալական խնդրի չի հանգեցնի դրանց վարորդների շրջանում, բանախոսը պատասխանեց. «Եթե մենք խոսենք անվտանգության տեսանկյունից, ապա սոցիալական հարցը երբեք չի կարող ավելի կարևոր լինել, քան անվտանգության հարցը:
Քաղաքի ծայրամասերում գազելներ հաստատ պետք կլինեն, և վարորդների մի մասը ակամա իր աշխատանքը չի կորցնի, իսկ երկրորդ կարևոր դրույթն այն է, որ պակասացնելով գազելների թիվը և ավելացնելով ավտոբուսների քանակը՝ բնականաբար, դուրս մնացած վարորդներն ունենալու են աշխատանք, քանի որ ավտոբուսներն են ավելանալու, և վարորդների կարիք կլինի: Եվ մեկ ուրիշ կարևոր հանգամանք էլ կա. քանի որ վարորդն իրավունք չունի վարելու օրական 16 ժամ, և եթե քաղաքապետարանը դա ստուգի և թույլ չտա այլևս, ապա մեկ ավտոբուսին բաժին է ընկնելու ոչ թե մեկ վարորդ, այլ երկու, որոնցից մեկը կվարի օրվա մի կեսը, իսկ օրվա մյուս կեսը կվարի մյուս վարորդը»:
Պիպոյանը վստահ է՝ միանգամայն հնարավոր է ոլորտը բարեփոխել այնպիսի ձևով, որը ձեռնտու կլինի բոլոր կողմերի համար:
Զրույցի ընթացքում անդրադարձանք նաև այս փոփոխությունների արդյունքում տրանսպորտի ուղեվարձի հնարավոր թանկացմանն ու ոլորտին առնչվող մի շարք այլ հարցերի:
Մանրամասները՝ տեսանյութում:
