Նախիջևանի մարզում Ադրբեջանի իշխանությունները նկատելիորեն ավելացնում են սպառազինության քանակը՝ դրանով իսկ բարձրացնելով տարածքի ռազմավարական նշանակությունը ինչպես Ադրբեջանի, այնպես էլ Հայաստանի համար:
Նախիջևանը Ադրբեջանից բաժանված է Հայաստանի տարածքով, բայց սահմաններ չունի երկար տարիներ հակամարտության գոտի համարվող Լեռնային Ղարաբաղի հետ: Նախիջևանը ավելի մոտ է գտնվում Երևանին և Հայաստանի տարածքում գտնվող ռազմավարական այլ թիրախների: Նախիջևանում սպառազինության կուտակման ռազմավարական նշանակության ևս մի հանգամանք է այն փաստը, որ նախագահ Ալիևի ընտանիքը ծնունդով այդ տարածաշրջանից է:
Ադրբեջանը Նախիջևանում նոր զորագունդ է ստեղծել, որ հայտնի է Միացյալ զինվորական խմբավորում անվամբ: Նախիջևանում տեղադրել է նաև հակաօդային պաշտպանության և հրթիռահրետանային նոր համակարգեր, այդ թվում՝ «Սմերչ», T-300 և T-122: Հավելումն՝ ամեն տարի այս տարածաշրջանում Թուրքիայի հետ միացյալ զորավարժություններ են անցկացվում:
«Թշնամին պետք է իմանա, որ Նախիջևանը պաշտպանված է ամենաուժեղ բանակի կողմից»,- հայտարարել է Ադրբեջանի պաշտպանության նախարար Զաքիր Հասանովը թուրք-ադրբեջանական վերջին զորավարժությունների ժամանակ:
«Թշնամին պետք է իմանա, որ Նախիջևանի հանդեպ սադրանքի դեպքում մենք հզոր պատասխան կտանք, և մի քանի րոպեի ընթացքում հարձակման կենթարկվեն Հայաստանի խոշոր քաղաքները»,- հայտարարել է Հասանովը անցյալ տարի՝ ապրիլյան մարտերից հետո:
Հայաստանը ուշադրությամբ է հետևում Նախիջևանում սպառազինության կուտակումներին: «Մենք պետք է հիշենք, որ կանգնած ենք պատերազմի վերսկսման սպառնալիքին դեմ հանդիման, և հակառակորդի կողմից ագրեսիան կարող է դրսևորվել ցանկացած ուղղությամբ»,- ասել է հայ վերլուծաբան Հրանտ Մելիք-Շահնազարյանը:
Սպառազինության հզորացումը Նախիջևանում սկսվեց մոտավորպես 2013թ.: Ներկայում այնտեղ գտնվում է մոտ 20 հազար զինվոր, մոտ 400 միավոր զրահամեքենա, ինքնաթիռ, հակաօդային և հրատանային համակարգեր: Ադրբեջանական զինուժի սպաներից մեկի խոսքով՝ սպառազինության շեշտը դրվում է ոչ թե քանակի ավելացման, այլ որակի բարձրացման վրա:
Տարածաշրջանում սպառազինության աճը իրականացվում է Թուրքիայի օգնությամբ: Թուրքիան որպես հիմք փաստարկում է 1921թ. Կարսի պայմանագիրը՝ ԽՍՀՄ-ի և Թուրքիայի միջև, ըստ որի իրեն իրավունք է վերապահում ապահովելու Նախիջևանի անվտանգությունը:
«Նախիջևանի բանակը ունակ է կատարելու ցանկացած առաջադրանք,- ասել է նախագահ Ալիևը հունվարին Նախիջևան կատարած այցի ժամանակ,- այստեղ տեղակայված են ամենաժամանակակից զինատեսակներ և զինամթերք»:
Սակայն երկու կողմերն էլ անկասկած հասկանում են, որ մեկ պետության մայրաքաղաքի ռմբակոծությանը կհետևի ավերիչ հակահարվածը, այդ պատճառով էլ Նախիջևանից հարվածներ կիրականացվեն միայն ծայրահեղ դեպքում:
Հայաստանի վրա Նախիջևանից հարձակում իրականացվելու դեպքում մասնավորապես Երևանը կարող է պահանջել, որ համաձայն ՀԱՊԿ կանոնակարգի՝ Ռուսաստանը միջամտի հակամարտությանը՝ հօգուտ Հայաստանի, ինչից շատ է աշխատում խուսափել Բաքուն: «Հաշվի առնելով, որ Հայաստանը ՀԱՊԿ անդամ է, Ադրբեջանը հազիվ թե նախահարձակ լինի՝ օգտագործելով Նախիջևանում առկա իր ռազմական ներուժը»,- ասել է ադրբեջանցի վերլուծաբան Ֆուադ Չիրագովը:
.