Սիրիայի նախագահ Բաշար Ասադը հայտարարել է, որ այլևս չի համարում Թուրքիային գործընկեր։ Այս մասին նա ասել է երկրի ԱԳՆ աշխատակիցների հետ հանդիպման ժամանակ՝ փոխանցում է SANA գործակալությունը։
Ասադը հիշեցրել է, որ Սիրիան պատրաստ է եղել քննարկելու բոլոր առաջարկները՝ ուղղված պատերազմի դադարեցմանը, չնայած նախապես իմացել է, որ առաջարկների մեծ մասն ունի ոչ բարի մտադրություններ։
Խոսելով Թուրքիայի նախագահ Ռեջեփ Թայիփ Էրդողանի մասին՝ նա նշել է, որ նրա ռեժիմի կողմից ահաբեկիչների աջակցության գաղտնազերծումից հետո պետության ղեկավարը խաղում է քաղաքական մուրացկանի դեր։ «Այդ իսկ պատճառով Սիրիան չի վստահում նրան, չի համարում թուրքական կողմին ո՛չ գործընկեր, ո՛չ երաշխավոր»,-ասել է սիրիացի առաջնորդը։
«Մենք թույլ չենք տա մեր թշնամիներին ու հակառակորդներին քաղաքականութամբ հասնել նրան, ինչին նրանց չհաջողվեց հասնել ահաբեկչության օգնությամբ»,-ասել է Ասադը։
Թուրքիան Ռուսաստանի ու Իրանի հետ հանդիսանում է Սիրիայում անվտանգության գոտիների ստեղծման մասին հուշագրի երաշխավոր երկիր։ Այն ստորագրվել էր Աստանայում, մայիսի 4-ին։