«Նաիրիտ» գործարանի նախկին աշխատակիցներն օրերս բաց նամակով դիմել են վարչապետ Կարեն Կարապետյանին՝ պահանջելով վերջնական պատասխան տալ՝ կապված գործարանի վերագործարկման հնարավորության հետ, ինչպես նաև խնդրելով կառավարությանը թույլ տալ «Եվրոպա Ասիա բիզնես ֆինանսական կենտրոն» հոլդինգին աուդիտ իրականացնելու գործարանում:
Գործարանի նախկին աշխատակից, «Նաիրիտ»-ի ցույցերը համակարգող խմբի անդամ Կարինե Շահվերդյանը «Առաջին լրատվական»-ի հետ զրույցում տեղեկացրեց, որ վերոնշյալ հոլդինգն ուզում է հուշագիր ստորագրել կառավարության հետ, որպեսզի կարողանան գործարանում աուդիտ իրականացնել, ինչպես նաև հոլդինգի ներկայացուցիչները պատրաստակամություն են հայտնել շուրջ 150 միլիոն եվրոյի չափով ներդրումներ անել գործարանը վերագործարկելու համար:
«Մենք գիտենք, որ գործարանի համար բազմիցս եկել-գնացել են ներդրողներ, բայց ոչինչ տեղի չի ունեցել, և, չգիտես ինչու, «Նաիրիտ»-ի հարցը օդից կախված է մնում, ու հիմա այնտեղ սնանկության կառավարիչն է արդեն տնօրինում: Վերջինիս օրոք արդեն մի քանի ամիս է, ինչ գործարանի գույքը, սարքավորումներն օտարվում են, և օտարվում են մետաղի ջարդոնի անվան տակ:
Մենք տեղեկություններ ունենք նաև, որ սնանկացման կառավարիչը 22 հազար տոննա մետաղի ջարդոնի պայմանագիր է կնքել, և արդեն մի քանի օր է՝ այդ աշխատանքներն են կատարվում: Մինչդեռ այս պահին ներդրողներ կան, գոնե այս պահին պետք է դադարեցնեն օտարման այդ գործընթացը: Ներդրողներն իրենց հուշագրում ներկայացրել են, որ ուզում են գործարանում աուդիտ անել, և դրա համար վեց ամիս ժամկետ են խնդրել, ինչը կառավարությանը դուր չի եկել, բայց չէ՞ որ կառավարությունը կարող է այլ ժամկետներ սահմանել, ներդրողներին ասել՝ չէ, վեց ամիսը երկար է, երեք, չորս կամ հինգ ամսում արեք ձեր այդ աուդիտը, կամ մյուս կետերն էլ, որն իրենց դուր չի գալիս, կարող են բանակցել, այլ առաջարկներ անել և ընդհանուր հայտարարի գալ, բայց, չէ, ո՞նց կլինի՝ մեր կառավարությունը ոչ մի բան չի ուզում անել. ո՛չ հուշագիր են ստորագրում, ո՛չ թույլ են տալիս աուդիտ անել, և ոչ էլ իրենք են սեփական նախաձեռնություն ցուցաբերում գործարանի վերագործարկման հետ կապված»,- նշեց Կարինե Շահվերդյանը:
Գործարանի նախկին աշխատակից Անահիտ Մանուկյանն էլ իր հերթին հավելեց. «Ցավն այն է, որ կառավարությունը փոխանակ ինքը շահագրգիռ լինի, որ օր առաջ ներդրողները մտնեն Հայաստան, օր առաջ «Նաիրիտ»-ում սնանկացումը կասեցվի, մի բան էլ չեն համաձայնում հուշագիրը ստորագրելուն ու ոչ մի քայլ չեն ձեռնարկում: Ավելին՝ դեռ մի բան էլ ներդրողներին ասում են, թե մեզ երաշխիք տվեք, որ ձեզ թույլ տանք մտնեք գործարան աուդիտ անեք. սա ապշելու բան է ուղղակի:
Իմ կարծիքով՝ գործարանում այնպիսի մեծ չարաշահումներ են եղել, որոնք այսօր թույլ չեն տալիս, որ ստորագրեն պայմանագիր «Նաիրիտ»-ը վերագործարկելու կամ այնտեղ աուդիտ անելու համար: Գործարանը նորից չաշխատեցնելու հիմնական պատճառը դա է, որ այնտեղ հսկայական թալան է եղել»:
Նաիրիտցիների խոսքերով՝ եթե առաջիկա օրերին աուդիտ անելու վերաբերյալ դրական պատասխան չստանան կառավարությունից, ապա պատրաստ են դիմել նստացույցի, անգամ հացադուլի և փողոց փակելու:
Մանրամասները՝ տեսանյութում:
