Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արսեն Նիկողոսյանի նախագահությամբ ավարտվել է Աշոտ Հ.-ի գործի դատական քննությունը:
Կոտայքի մարզի 39-ամյա բնակիչ, ամուսնացած Աշոտը մեղադրվում էր տուժողի առողջությանը թեթև վնաս պատճառելու և տուժողին սպանության սպառնալիքներ տալու համար՝ ՀՀ քրեական օրենսգրքի 117 հոդվածով և 137 հոդվածի 1-ին մասով:
Ըստ մեղադրանքի՝ 2016 թվականի նոյեմբերի 23-ին, գիշերվա ժամը 4-ի սահմաններում Երևանի Ա. Խաչատրյան փողոցում կայանված, իր կողմից շահագործվող «Օպել» մեքենայում Աշոտ Հ.-ն ցանկացել է սեքսուալ բնույթի ծառայություններ ստանալ իր մեքենայի մեջ գտնվող Հայկանուշ Զ.-ի (անունը փոխված է) կողմից, բայց Աշոտի ու Հայկանուշի միջև վեճ է սկսվել:
Օգնության է շտապել Հայկանուշի ընկերը, ում տեսնելով՝ Աշոտը մեքենայով դիմել է փախուստի՝ իր հետ տանելով նաև Հայկանուշին: Ճանապարհին՝ մեքենայի մեջ, Աշոտ Հ.-ն, ըստ մեղադրանքի, իր մոտ եղած դանակն ուղղել է Հայկանուշի պարանոցին, նրա հասցեին տվել է սպանության սպառնալիքներ, որոնք Հայկանուշը ընկալել է որպես իրական վտանգ պարունակող սպառնալիքներ: Միաժամանակ, ըստ մեղադրանքի, Աշոտ Հ.-ն դանակով վնասել է Հայկանուշի աջ ձեռքի մատները՝ Հայկանուշի առողջությանը պատճառելով թեթև վնաս՝ առողջության կարճատև քայքայումով:
2017 թվականի օգոստոսի 11-ին գործը քննող դատարանում ստացվել է ամբաստանյալ Աշոտի և տուժող Հայկանուշի դիմումը. «Մենք եկել ենք հաշտության, միմյանց նկատմամբ բողոք, պահանջ չունենք: Խնդրում ենք քրեական գործի վարույթը կարճել…»:
Դատարանում Աշոտ Հ.-ն ասել է, թե զղջում է կատարածի համար, իսկ տուժող կինը հավաստիացրել է, որ ամբաստանյալի դեմ բողոք, պահանջ չունի:
Քանի որ Աշոտին մեղսագրված արարքները մասնավոր բողոքի ոլորտից էին, օրենքով նախատեսվում է կողմերի հաշտության հիմքով գործի վարույթի կարճումը:
Դատարանը, կողմերին ևս մեկ անգամ լսելով, որոշել է քրեական գործի վարույթը կարճել՝ տուժողի և ամբաստանյակի հաշտության հիմքով:
Որոշումն օրինական ուժի մեջ մտնելուց հետո իրեղեն ապացույց ճանաչված դանակը կոչնչացվի:
