«Երևանն այսօր ունի հազարավոր խնդիրներ, և «Ելք» դաշինքը որպես ընդդիմադիր կեցվածքով գործիչներ, պետք է փորձեր այդ հազարավոր պրոբլեմները վեր հանել․Երևանը խեղդվում է այդ պրոբլեմների մեջ և երևի այստեղ պետք է մտածենք այսպես, որ նրանք այդ պրոբլեմների արդյունավետ լուծման ձևը գտել են նրա մեջ, որ վերանվանում ենք այդ փողոցները և վիճակը նորմալանում է»,- «Առաջին լրատվական»-ի հետ զրույցում նշեց «Ղարաբաղ» կոմիտեի անդամ Աշոտ Մանուչարյանը՝ անդրադառնալով Երևանի ավագանու «Ելք» խմբակցության այն նախաձեռնությանը, ըստ որի՝ Երևանի այն դպրոցները և փողոցները, որոնք անվանակոչված են հայ բոլշևիկների, ռուս գրողների կամ կոմունիստ գործիչների անուններով, պետք է վերանվանվեն։
«Ելք»-ը, օրինակ, առաջարկում է Երևանի Լենինգրադյան փողոցն անվանակոչել արցախյան պատերազմի հերոս Լեոնիդ Ազգալդյանի անունով, Սարգիս Կասյանի, Անաստաս Միկոյանի անվան փողոցները վերանվանել ազգային հերոսների անուններով և այլն։
Ըստ Աշոտ Մանուչարյանի՝ սա օրակարգ բերված արհեստական հարցադրում է, և «Ելք»-ի անդամների կողմից փորձ է կատարվում մարդկանց ուշադրությունը շեղել քաղաքի իրական խնդիրներից։
«Ես կգերադասեի, որպեսզի Նիկոլ Փաշինյանն ու նրա ընկերներն ուշադիր լսեին Տարոն Մարգարյանին ուղղված Սերժ Սարգսյանի այն հանձնարարականը, որ Երևանը պետք է դարձնել հայության մայրաքաղաք․ես պարզապես երջանիկ եմ, որ Սերժ Սարգսյանը ի վերջո լսեց մտավորականների ձայնը, նրանց կոչը և այսպիսի խնդիր առաջ քաշեց, բայց այսպիսի հարց լուծելը պահանջում է հեղափոխական մոտեցում հարցերին, և որպեսզի մարդիկ գիտակցեն, թե ինչ պետք է անեն դրան հասնելու համար։
Պատմական հիշողության մեջ պետք է լինի հետևյալը, որ հայ ժողովուրդը ֆաշիզմի դեմ պատերազմի ժամանակ հսկայական ավանդ է ունեցել և Լենինգրադ քաղաքն էլ Խորհրդային երկրի, որի մասն էինք մենք այդ ժամանակ, այդ քաղաքն այդ դիմադրության ամենաբարձր կետերից մեկն էր, և Լեոնիդ Ազգալդյանը, որը բարձր մտքերի և հոգևոր արժանիքների տեր անձնավորություն էր, հավաստիացնում եմ ձեզ, որ,միանշանակ, գրողի ծոցը կուղարկեր այդ բոլոր նախաձեռնողներին այդպիսի նախաձեռնության հետ միասին, որովհետև չի կարելի հոգևոր ժառանգությունը ոչնչացնել»,-նշեց բանախոսն ու միևնույն ժամանակ հավելեց․
«Ես կխնդրեի «Ելք»-ի մեր բարեկամներին, որպեսզի նրանք մի հատ փնտրեին իրենց մեջ, թե այդ ո՞նց եղավ, որ այդ միտքը եկավ ու մտավ իրենց գլուխը, որտեղի՞ց նրանք մտածեցին, որ քաղաքը հիմա ուրիշ պրոբլեմ չունի, քան փողոցների վերանվանման պրոցեսը, որը նաև բզկտում է մարդկանց, չէ՞ որ կոմունիստներ կան Հայաստանում, կան ավագ սերնդի մարդիկ, որոնք առարկում են դրան և սա մարդկանց մեջ պառակտում է մտցնում։ Այդ նախաձեռնությունն ուղղված է մեր երկիրը ոչնչացնելուն և ուղղակի նախաձեռնողները չեն հասկանում հիմա, որ իրենք մասնակցում են ավանդույթը ոչնչացնելու, երկրում պառակտում մտցնելու գործընթացներին»։
Մանրամասները՝ տեսանյութում։
